“Për mua, një rezultat i mirë në Vlorë është të mos humbasim”. Kështu është shprehur në konferencën e djeshme për shtyp trajneri i Luftëtarit, Mlladen Milinkoviç. Gjatë gjithë javës, serbi i pankinës është munduar t’i mbajë lojtarët me këmbë në tokë, duke shmangur euforinë, që ndoshta gjirokastritëve ua imponojnë pozitat komode që kanë në klasifikim. Milinkoviç u ka kujtuar të tijve atë humbje të thellë në fazën e parë në Vlorë.
“Edhe para humbjes 5-0 që pësuam në Vlorë, Flamurtari kishte probleme, ashtu si dhe kohët e fundit, por e nesërmja do të jetë një ndeshje ndryshe. Tani jemi në pozita më komode, por mos harrojmë se janë një skuadër shumë e mirë. Flamurtari nuk e ka filluar mirë vitin, por unë nuk e ndryshoj mendimin tim, kur them se është një nga skuadrat më të mira.
Ata kanë vërtet probleme me dëmtimet dhe penalizimet, por në disa raste këto rezultojnë të rrezikshme. Ne do të japim më të mirën në fushë, do të tregohemi seriozë dhe të përqendruar në çdo situatë”, theksoi trajneri bluzi.
Terreni
I kujdesshëm me deklaratat në prag të ndeshjes, Milinkoviç shfaqi shqetësimin e tij për gjendjen e terrenit të stadiumit “Flamurtari”. Për 48-vjeçarin serb, ky është një element i rëndësishëm.
“Mendoj se një problem për ne mund të jetë gjendja e fushës, por do të përpiqemi të përshtatemi me terrenin. Për fat të mirë, ekipi është i plotë, me përjashtim të dy futbollistëve afrikanë: Bengui dhe Usama, të cilët ende nuk i janë bashkuar grupit. Sa i takon formacionit, mund të them se vetëm nesër (sot), kur të shikojmë dhe përshtatemi me gjendjen e fushës, atëherë dhe do të bëjmë të ditur 11 lojtarët që do ta nisin nga minuta e parë”, përfundoi trajneri i skuadrës gjirokastrite.
Ndërkohë, nisur nga ajo që ka praktikuar në stërvitjet e fundit, edhe në Vlorë pritet që Luftëtari të hedhë në fushë një formacion me theks sulmues, ku katërshja Rroca, Bregu, Abazaj dhe Rexhinaldo do kenë më shumë detyra ofensive, teksa nga këta lojtarët pritet edhe goli./panorama sport
