Për herë të parë këtë vit të ri akademik, Mësuesia është programi i studimit ku ka patur më shumë studentë të regjistruar. Këtë e konfirmon zyrtarisht ministrja e Arsimit, Lindita Nikolla, duke saktësuar se 100% e studentëve që janë regjistruar në Mësuesi, kanë mesatare mbi notën 7 ashtu siç ishte përcaktuar me vendim të qeverisë. Sa i përket Universitetit ‘Eqrem Çabej’ në Gjirokastër, regjistrimet kanë qenë shumë të ulëta në këtë degë.
Natyrisht që ky nuk është një lajm i mirë, jo thjesht për universitetin, por edhe për arsimin parauniversitar në krejt jugun e vendit, pasi nga ky institucion përgatiten pjesa më e madhe e mësuesve të shkollave. Shqetësim më vete për këtë çështje është justifikimi që kanë dhënë vazhdimisht drejtuesit e këtij universiteti. Rektori dhe zv.rektori në çdo dalje publike, madje edhe sot në ditën e parë të vitit akademik, janë kujdesur të theksojnë me forcë se Mësuesia në Gjirokastër është penalizuar nga vendimi i qeverisë për mesatare mbi notën 7. Formalisht ngjan të jetë kështu, por kjo që thonë drejtuesit e universitetit nuk është argument.
Nota mesatare mbi 7 është ndoshta një nga vendimet më të mira që është marrë për arsimin në tërësi. Maturantë me mesatare mbi 7 që regjistrohen në universitet për t’u bërë mësues të ardhshëm, është një lajm që duhet të na gëzojë. Sepse praktikisht dikush me mesatare mbi 7 ka më shumë garanci për të qenë mësues i mirë pas 5 vitesh studimi sesa një maturant me mesatare nën 7. Drejtuesit e Universitetit ‘Eqrem Çabej’ e trajtojnë si fatkeqësi vendosjen e notës mesatare mbi 7 për degën e Mësuesisë. Kur në fakt duhet të ishte e kundërta. Duhet ta kishin duartrokitur këtë vendim. Shqipëria sot ka nevojë për mësues më të mirë, jo thjesht mësues me një diplomë. Deri më tani, universitetet shqiptare, përfshi edhe atë të Gjirokastrës, kanë nxjerrë plot mësues me mesatare 5 apo 6.
Për fat të keq një pjesë e mirë e atyre mësuesve sot janë në sistem, mësojnë fëmijët tanë. Për herë të parë këtë vit akademik kanë nisur studimet kandidatë për mësues me mesatare më të mirë. Ky lajm duhet na gëzojë të gjithëve si shoqëri. S’ka vend për të vënë kujën, siç për fat të keq po bëjnë drejtuesit e Universitetit të Gjirokastrës. Nuk mund të justifikosh dështimin tënd si universitet, duke mos qenë atraktiv aq sa duhet për maturantët me mesatare mbi 7, me faktin se qeveria ka rritur ‘stekën’ për ata që duan të bëhen mësues. Gjasat janë që këtej e tutje të kemi mësues më të mirë.
Kjo është ajo që i intereson publikut. Ndërsa çështja e numrave në degët e universitetit, varet nga sa atraktiv është ky universitet për maturantët, sa konkurrues është me universitetet e tjera. Universiteti i Gjirokastrës ka nevojë për reformim. Kush e kundërshton këtë gjë, thjesht kërkon të ruajë ‘status quonë’ dhe të vazhdojë të marrë rrogën. Ky takëm njerëzish janë armiqtë më të mëdhënj të universitetit. Ata nuk e duan universitetin, nuk e duan Gjirokastrën. Shohin vetëm rrogën dhe çdo përfitim tjetër, të ligjshëm apo të paligjshëm, që rrjedh nga statusi i të qenit pedagog.
©ArgjiroLajm.net
