Mbledhja e sotme e Këshillit Bashkiak të Gjirokastrës është shoqëruar me debate të ashpra. Drejtori i Agjencisë së Mirëqënies Sociale, Armand Mamani, ishte thirrur për të raportuar mbi investimet që ka kryer Bashkia Gjirokastër në shkollat e kësaj bashkie. Teksa këshilltari i PD-së, Ilir Gushi, kërkoi që në raportimin e tij të ishin të pranishëm edhe drejtorët e shkollave, Mamani nuk e mirëpriti diçka të tillë dhe nisi të reagonte ashpër. “Asnjë këtu nuk është më i mirë se unë, as ti Gushi”, tha Armand Mamani duke u larguar më pas nga mbledhja. Në këtë mënyrë raportimi i tij në Këshillin Bashkiak nuk u krye. Prej disa kohësh drejtorët e shkollave në Gjirokastër akuzojnë bashkinë për mungesë investimesh. Korit të akuzave i është bashkuar shpesh edhe drejtoresha e DAR, Lindita Rova. Bashkia Gjirokastër nga ana tjetër justifikohet me mungesë fondesh. Sigurisht që ka një shqetësim real për mungesë investimesh nga bashkia, por nuk duhet të harrojmë nga ana tjetër as përpjekjen e PS-së dhe mediave të saj (Tv Gjirokastra) për ta instrumentalizuar më tej këtë çështje. Po vjen fushata!
©ArgjiroLajm.net
