Mbërrin tek Krimet e Rënda babai i minoritarit të vrarë Kostandinos Kacifas. Jani Kacifas është thirrur sot nga Prokuroria e Krimeve të Rënda, e cila ka në dorë çështjen për t’u marrë në pyetje për ngjarjet e ndodhura nga Bularat më 28 tetor ku pasi qëlloi për orë të tëra mbi policinë, 35-vjeçari u vra nga forcat speciale.
Vrasja e Kacifas ka sjellë reagime të forta nga Greqia si nga ana e qeverisë ashtu dhe e qytetarëve, kryesisht ata ekstremistë. Nga ana tjetër Shqipëria kë kërkuar të mos ndërhyhet në këtë çështje që po hetohet intensivisht nga Prokuroria e Krimeve të Rënda.
Në disa qytete të Greqisë janë zhvilluar protesta. Ndërkohë një grup prej katër ekspertësh të Institutit të Mjekësisë Ligjore, ka kryer ekspertizën në trupin e Kostandinos Kacifas, minoritarit grek që vra nga RENEA në Bularat të Gjirokastrës. Ekspertët do të përcaktojnë se cila është distanca prej nga është qëlluar Kacifas dhe nëse ka shenja dhune ne trupin e viktimës.
Familjarët e viktimës, pretendojnë se i afërmi i tyre, është qëlluar nga një distancë e afërt. Por nga ana tjetër specialët e RENEA këmbëngulin se të shtënat kanë qenë nga një distancë e konsiderueshme. Burimet thonë se viktima ka dy plagë kraharor. Janë mjekët ligjore, që do të thonë fjalën e fundit, për mënyrën sesi është qëlluar ndaj Kacifasit dhe distancën prej nga është qitur me armë në drejtim të tij.
Ndërsa përmes analizave toksikologjike, do të përcaktohet nëse 35-vjeçari ka qenë nën efektin e ndonjë substance. Trupi i pajetë i Kostandinos Kacifas u transportua mbrëmjen e së martës nga Gjirokastra për në Morgun e Tiranës dhe do të mbahet aty deri në përfundim të ekspertizës, e cila mendohet të përmbyllet brenda një jave.
