Nga një nxënës i shkollës artistike ‘Feim Ibrahimi’ në Gjirokastër tek jeta e zhurmshme në klubet e natës në kryeqytet. Kjo është historia e Stefan Vasilit, 22-vjeçarit nga Gjirokastra që pasionin e tij për muzikën e ka shndërruar në profesion. Ai punon si Dj në lokale të ndryshme nate në Tiranë qysh prej kohës kur u zhvendos nga Gjirokastra për të ndjekur studimet për Teknologji Informacioni. Performancat e tij të para nisën në moshën 15-vjeçare në një prej lokaleve të njohur asokohe në Gjirokastër, ‘Venium Club’.
Nën mentorimin e një tjetër Dj të njohur në Gjirokastër, Stefani nisi pak nga pak të krijonte identitetin e tij nën emrin artistik Dj Beltrame, emër të cilin ia kanë ‘ngjit’ bashkëmoshatarët e liceut artistik duke marr shkas nga një ish futbollist asokohe i Juventusit. Vit pas viti Stefani nisi të luante muzikë pothuajse në të gjitha lokalet e Gjirokastrës dhe më pas në Sarandë, qytet ku shkon çdo sezon veror.
‘Arena’, ‘Atika’, ‘Telecom Longue’, ‘Tema’ dhe ‘Artisti’ janë vetëm disa prej lokaleve të Tiranës ku luan Dj Beltrame. Por Stefan Vasili nuk është thjesht një i ri i apasionuar pas muzikës dhe që punon si Dj. Ai ka një tjetër histori frymëzuese për çdo të ri tjetër që zgjedh ta braktisë Gjirokastrën; Stefatin ka vendosur të rikthehet në qytetin e gurtë pas përfundimit të shkollës, me shpresën për të krijuar një biznes në industrinë e shërbimeve dhe turizmit, duke mos hequr dorë natyrisht as nga pasioni për muzikën. ‘Jeta në Tiranë është sfiduese, por emocionet më të mëdha i kam sa herë luaj në Gjirokastër’, tregon ai gjatë një bisede me Argjirolajm.net
