Nxënës nga Gjirokastra bëhen pjesë e programeve edukative të Muzeut Kombëtar të Përgjimeve “Shtëpia me Gjethe”. Nxënësit e shkollës “Urani Rumbo”, Gjirokastër, morën pjesë në programin edukativ “Mbresa” të organizuar nga Muzeu Kombëtar i Përgjimeve “Shtëpia me Gjethe”.
Projekti “Mbresa” është një program edukativ dhe artistik i cili përfshin nxënësit e shkollave të mesme. Programi kurorëzohet me një konkurs në këto gjini artistike: 1- arte pamore (pikturë, skulpturë, instalacion) 2- krijim letrar (ese, poezi etj), 3- muzikë (melodi, këngë), risi teknologjike etj.
Disa nga objektivat e këtij programi janë : përfshirja, angazhimi, nxitja e të rinjve për të marrë pjesë në aktivitete krijuese/edukuese, njohja e tyre me regjimin komunist shqiptar si dhe njohja me veprimtarinë represive të Sigurimit të Shtetit, reflektimi rreth kësaj të kaluare, promovimi i talenteve të reja etj.
Nxënësit do të vizitojnë muzeun dhe në bazë të ndjesive të përftuara apo mbresave do të krijojnë në gjinitë artistike të lartpërmendura të cilat duhet t’i sjellin në muze deri në 2 javë pas vizitës.
Në fund të projektit, më datë 23 maj do të organizohet një ekspozitë me punët më të mira. Punimet do të pranohen deri më datë 30 prill. Me pas ato do të ekspozohen për rreth 2 javë në faqen e Facebook të muzeut dhe krijimi që do të marrë më shumë pëlqime do të vlerësohet me çmim të veçantë. Është parashikuar që krijimet më të mira të vlerësohen me një çmim simbolik si dhe të bëhen pjesë e një katalogu.
