Edi Rama nuk e kishte thirrur Zamira Ramin në takimin e sotëm ‘Bashkia që Duam’ në Pallatin e Sportit në Gjirokastër. Tashmë s’mund të ketë më dyshime se ai s’ka ndërmend ta rikandojë atë për një mandat të dytë si propozim kësaj here të Partisë Socialiste. Por sot Rama bëri diçka tjetër, refuzoi të komentonte punën e saj për 4 vjet në krye të Bashkisë Gjirokastër, ndonëse kishte thirrur njerëzit në një takim për atë se si duhet të jetë pushteti vendor.
“E kemi fituar bashkinë e Gjirokastrës në koalicion. Nuk dua të bëj asnjë diskutim dhe nuk dua të them as fjalën më të vogël për kryetaren e bashkisë që ka marrë mbështetjen e të gjithëve ne për të qeverisur bashkinë por nga ana tjetër është pak por e sigurtë që siç po ndodh me qeverinë qëndrore, ku shumë gjëra po ecin më shpejt dhe shumë shpejt shumë gjëra do të bëhen shumë më mirë seç ishin, ashtu do të ndodhë dhe me Gjirokastrën. Shumë gjëra me ne do të ecin shumë më shpejt dhe do të bëhen shumë më mirë seç ishin”, tha Rama.
Por përse Rama zgjodhi të heshtte për Zamira Ramin? Sigurisht që ky është gjest i tij edhe prej xhentëllmeni, por më së shumti ka një arsye tjetër. Ai e ka propozuar vetë Zamira Ramin bashkë me Ilir Metën si kandidate të përbashkët të koalicionit ‘Për Shqipërinë Europiane’. Në emër të kësaj aleancë, Rama kishte dalë para gjirokastritëve 4 vjet më parë dhe kërkoi vota për Zamira Ramin.
Prandaj sot ai s’mund të dilte dhe ta sulmonte, ndonëse shumë prej atyre që i servilosen sot Kryeministrit në Gjirokastër, mezi prisnin të dëgjonin diçka të tillë nga goja e tij. Qëndrimi i Ramës karshi Zamira Ramit mund të shpjegohet edhe me qasjen e saj karshi koalicionit PD-LSI. Zamira Rami s’ka folur kurrë me gjuhën e Monikes dhe as të Lulit.
As me gjuhën e Roland Bejkos dhe as të Dasho Alikos. Zamira Rami ka përbuzur protestat dhe shpesh herë qëndrimet e tyre. Thënë këto, ajo i ka lënë vend vetes tek Edi Rama. Pikërisht për këtë arsye Kryeministri e kurseu sot nga sulmet, jo se performanca e saj në krye të bashkisë është për t’u lavdëruar. Nëse Zamira Rami do të ishte fjala vjen si Voltana Ademi në Shkodër, Edi Rama do ta kishte më lehtë për ta ‘zgjidhur gjuhën’ me kryebashkiaken e Gjirokastrës.
©argjiroja.net
