Pavarësisht momentit aktual politik me bojkot e djegie mandatesh opozita do të futet në zgjedhjet lokale, qoftë kur ato të bëhen në muajin qershor apo në vjeshtë në rast se shtyhen. Për Bashkinë Gjirokastër ka dalë së fundi një tjetër emër për të qenë kandidat i mundshëm i koalicionit PD-LSI. Ai është Ilir Gushi.
59-vjeçari me profesion ekonomist është aktualisht anëtar i Këshillit Bashkiak dhe pjesë e Kryesisë së PD Gjirokastër. Ndërkohë në aspektin profesional, aktualisht Gushi drejton filialin e një banke të nivelit të dytë në qytet. Më herët ai ka punuar edhe si kancelar në Universitetin ‘Eqrem Çabej’. Mësohet se emri i Gushit shihet kryesisht si propozim i Dasho Alikos dhe Roland Bejkos. Por sidoqoftë deri më tani s’ka asgjë zyrtare.
Ilir Gushi është një prej zërave më të artikuluar të demokratëve në Këshillin Bashkiak, sidomos kur vjen fjala tek çështjet që lidhen me ekonominë. Por nuk mjafton vetëm kjo për të hyrë në një garë të vështirë, ku e vetmja lehtësi janë plus 2 mijë vota ‘neto’ nga Lazarati. Pjesa tjetër është një e përpjetë e gjatë sepse Gjirokastra historikisht njihet si bastion i socialistëve. Sidoqoftë deri në zyrtarizim të kandidaturave duhet të presim.
©argjiroja.net
