Pasuritë kulturore në të gjithë Shqipërinë po vëzhgohen dhe mirëmbahen në mënyrë sistematike nga specialistët e Drejtorive Rajonale të Trashëgimisë Kulturore.
Specialistët e DRKK Gjirokastër pas një ndërprerje për shkak të kushteve atmosferike të papërshtatshme kanë rifilluar punën tek banesa “Kabilatët”, monument kulture i kategorisë I.
Ndërhyrja konsiston në restaurimin e sprethit në pjesën jugore dhe një pjesë të çatisë të kësaj banese.
Banesat e bukura gjirokastrite gëzojnë karakteristika të veçanta që lidhen me terrenin mbi të cilin janë ndërtuar.
Gjirokastra ka 56 banesa monumente kulture të kategorisë së parë, 502 të kategorisë së dytë dhe shumë komplekse të tjera me vlera historike, arkitektonike dhe kulturore.
Qyteti ruan të paprekur skemën urbanistike, ku çdo shtëpi ka karakteristika të veçanta, që lidhen me terrenin mbi të cilin është ndërtuar.
Kujdesi, mirëmbajtja dhe promovimi i trashëgimisë sonë kulturore është një mision i përbashkët, për t’i përçuar këto pasuri, në mënyrën e duhur, tek brezat e ardhshëm.
