Pasi nxori alibinë se gjoja kishte ngatërruar emrin e babait në formularin e deklarimit të heqjes dorë nga mandati i deputetit, Vangjel Tavo komenton së fundi edhe vendimin e Ediola Brahës për të thyer qëndrimin e LSI-së. Tavo shprehet shumë i zhgënjyer nga vendimi i Brahës sepse sipas tij mandati i deputetit nuk është personal, por është i partisë e cila e ka futur në listë.
“Mua më vunë në listë të parin, Ediola e dyta e kështu me radhë. Këtu bëhet fjalë për një mandat të një force politike e cila ka marrë një vendim. Ne jemi të detyruar të zbatojmë këtë vendim të forcës tonë politike. Ky mandat është i LSI-së, as i imi personal dhe as i Ediolës”, thotë Tavo.
Mos bëni si bëj unë, por bëni si them unë. Ky është morali i Vangjel Tavos. Në zgjedhjet e vitit 2009 ai mori mandatin e deputetit përmes listës së PS-së në Gjirokastër, po përmes sistemit proporcional rajonal. Një vit më vonë, u largua drejt LSI-së dhe qeverisë së Sali Berishës, duke marrë me vete mandatin që i dhanë socialistët. Pra, Vangjel Tavo i kërkon Ediola Brahës sot, të bëjë atë gjë që ai nuk e bëri vetë 9 vjet më parë. Pse nuk e la Tavo mandatin përpara se të shkonte tek LSI-ja?
Edhe ai ishte një mandat i PS-së që e kishte futur në listë. Sikundër ne e kemi theksuar edhe në një shkrim të mëhershëm, Vangjel Tavo është i fundit që mund të gjykojë Ediola Brahën. Njësoj siç ai bëri pazar në vitin 2010 me mandatin që mori prej socialistëve në Gjirokastër, edhe Ediola Braha sot është në të drejtën e vet të bëjë pazar, qoftë me Edi Ramën apo këdo tjetër që mund t’i dalë përpara.
Pastaj kostot apo përfitimet i llogarit vetë Ediola. Ne nuk po legjitimojmë pazarin në politikë, as trafikimin e mandatave, por për aq kohë sa shohim se këtu bëjnë të gjithë pazar dhe se politika është bordello e madhe, s’ka moral Vangjel Tavo t’i hakërrehet Ediola Brahës. Së paku Vangjel Tavo duhet të mos flasë për këtë rast sepse e ka trafikuar vetë një mandat dhe është përfshirë vetë në pazar politik në vitin 2010. Shihni më poshtë videon ku ai komenton gjatë një takimi në Këlcyrë vendimin e Ediola Brahës.
©argjiroja.net
