Stresi i mungesave dhe problemet e tjera, që e kanë shoqëruar, e bënë që të deklaronte se në ndeshjen e radhës, me Luftëtarin, Vllaznia do të kishte sërish mungesa. Armando Cungu ka përmendur rastin e Bicajt, që kishte plotësuar, sipas tij, tre kartonët e verdhë. Por, në fakt, situata rezulton ndryshe.
Ka qenë vetë lojtari, i cili në stërvitjen e djeshme i ka komunikuar trajnerit se kishte dy të verdha dhe më pas kjo gjë është verifikuar në FSHF. Në të vërtetë ka rezultuar kështu.Mbrojtësi shtatlartë, pasi është pezulluar herën e parë për plotësim të numrit tre të kartonëve të verdhë, të parin në vazhdim e ka marrë në ndeshjen me Partizanin, në rastin e shkaktimit të 11-metërshit.
I dyti ishte ai ndaj Skënderbeut, të shtunën. Kjo do të thotë se ai do të jetë i gatshëm për sfidën e radhës, në Gjirokastër.Ky është një lajm i mire, në fakt, sepse skuadra në këtë takim shumë të rëndësishëm do të jetë më e plotë. Rikthehen nga skualifikimi edhe Vrapi, Gocaj e Krymi, ndaj mbrojtja e mesfusha plotësohen. Po ashtu, pritet edhe rikuperimi i ndonjërit nga lojtarët e dëmtuar dhe Vllaznia, në këtë mënyrë, do të tentojë patjetër marrjen e pikëve në transfertën gjirokastrite.
