Ora News raportoi gjatë ditës lajmin se Alket Qëndros, drejtorit të Tatimeve në Sarandë, i ishte kërkuar dorëheqja nga detyra. Sipas këtij raportimi, argumenti për kërkesën e dorëheqjes ishte rifreskimi i strukturave. Por më vonë vetë Qëndro ka thënë se askush nuk i ka kërkuar dorëheqjen, por ai do të largohet për të marrë një detyrë tjetër. Duke folur për SarandaWeb, ai përmendi edhe faktin se ka realizim 107% të planit të mbledhjes së të ardhurave. Por e vërteta është ndryshe dhe natyrisht që nuk pritet të thuhet publikisht prej Qëndros. Aksioni kundër informalitetit zbuloi një gropë të madhe financiare në Sarandë. Qindra biznese fshehnin të ardhurat dhe bëjnë evazion fiskal.
Tejkalimet e planit që thotë Qëndro nuk janë domethënëse në një kohë kur dihet se planifikimi i të ardhurave bëhet qëllimisht në një nivel të caktuar, lehtësisht i arritshëm, në mënyrë që nga ana tjetër t’i hapet rruga ekonomisë informale. Pra, ‘tavanin’ e caktojnë qëllimisht të ulët për ta arritur lehtësisht, por ky planifikim nuk përkon me gjendjen reale në terren; numrin e bizneseve që operojnë, deklarimet e të ardhurave etj. Dhe aksioni antiinformalitet, edhe pse kishte natyrisht dimensionin propagandistik nga qeveria, zbuloi se në Sarandë niveli i evazionit fiskal është i lartë.
Kjo është arsyeja e parë e lëvizjes së Alket Qëndros, por jo domosdoshmërisht më kryesorja. Ministrja e re e Financave, Anila Denaj, është zotuar se deri në vjeshtë do t’i shkarkojë të gjithë drejtorët e Tatimeve, për t’i zëvendësuar me të tjerë. Kështu ndodhi edhe në qytete të tjera dhe ky është një proces që do të vijojë. Kujtoni në fillim të këtij muaji largimin e drejtorit të Gjirokastrës. Me radhë do të ‘bien’ të gjithë emërimet e Arben Ahmetajt apo qoftë edhe të Koço Kokëdhimës, siç është në fakt rasti i Alket Qëndros.
Ky i fundit qëndron në atë pozicion prej 5 vitesh. Të gjithë drejtorëve të Tatimeve në Shqipëri u është kërkuar në grup dorëheqja. Kjo që thotë Alket Qëndro se po largohet vetë për një detyrë tjetër, është thjesht zbukurim, për të mos thënë se e kanë detyruar të veprojë kështu. Natyrisht ai është në të drejtën e vet të thotë se po largohet me dëshirë për një pozicion tjetër, por nuk është kjo e vërteta.
S’ka zyrtarë me integritet kaq të lartë në Shqipëri, që të japin dorëheqjen nga detyra se gjoja janë mërzitur në një pozicion apo se administrata ka nevojë për shërbimin e tyre në një ofiq tjetër. Aq më shumë kur bëhet fjalë për Tatimet, si një prej institucioneve më të lakmuara për arsye që i dimë të gjithë. Megjithatë herët ose vonë Alket Qëndro do të lëvizte nga ky pozicion. Edi Rama ka paralajmëruar ‘furtunë’ në radhët e drejtuesve në të gjithë vendin. Kushdo që ka mbi 4 vite në detyrë, pavarësisht performancës, nuk e mbyll dot vjeshtën në pozicionin që mban.
©argjiroja.net