Luftëtarit iu deshën katër javë për t’u rikthyer te fitorja. Tri pikët në transfertën e Durrësit kanë ardhur në momentin më të mirë për skuadrën bluzi, që ka “blinduar” vendin e katërt. Në Gjirokastër janë me këmbë në tokë, pasi java e 26-të i rezervon Luftëtarit një sfidë shumë se të vështirë kundër Tiranës.
Nga fitorja në Durrës, bluzinjtë kanë humbur shërbimet e lojtarit polivalent, Oltion Rrapaj, i cili ka plotësuar numrin e kartonëve. Mirëpo, lajm i mirë për trajnerin Milinkoviç është rikthimi i tre titullarëve me shumë peshë në kampin bluzi: mbrojtësi Lejdi Liçaj dhe sulmuesi Arturo Rexhinaldo, që munguan për shkak kartonësh, ndërsa pritet edhe rikthimi pas riaftësimit nga dëmtimi i Behar Ramadanit.
“FINALJA”
Për të konsoliduar vendin që mban aktualisht, Luftëtarit i duhet të marrë tri pikë ndaj një rivali direkt si Tirana. Në fazën e parë, fitorja 2-1 e gjirokastritëve në fushën asnjanëse të Peqinit, falë golave të Rexhinaldos dhe Bregut, ishte fillimi i një vazhdimësie të ndritur për bluzinjtë. Pas 25 javëve të luajtura, Luftëtari, ndryshe nga sa ishte menduar, nuk ka shanse vetëm të mbijetojë, por të shikojë edhe lart në renditje.
Përmes vendit të katërt, Luftëtari ka shanse të kapë edhe Europën, gjithnjë nëse Skënderbeu do të arrijë të fitojë Kupën e Shqipërisë. Ndeshja e së dielës me Tiranën pritet të sjellë në stadium një numër rekord tifozësh gjirokastritë.
“Luftëtari nuk mund të konsiderohet skuadër surprizë, pasi me rezultatet e tij na ka lumturuar pafundësisht. Të gjithë duhet t’i frikësohen Luftëtarit kur ka dhe shumë pikë në lojë”, thonë tifozët gjirokastritë, ndërsa kujtonin dje 88-vjetorin e themelimit të klubit, që në historinë e tij ka mundur vetëm të shpallet nënkampion në sezonin 1977-1978, kur skuadra e emrave të mëdhenj si Braho, Kalluci etj., drejtohej nga Hito Hitaj./panorama sport
