Moti i keq gjunjëzon Europën. Të paktën 3 persona kanë humbur jetën për shkak të përm-bytjeve që prekën jugun e Francës. Konfirmimi vjen nga ministria e Brendshme, që thekson se rreth 2 mijë zjarrfikës dhe punonjës shpëtimi janë angazhuar në rajon.
Lumenjtë dolën nga shtrati pas shirave të dendur që pushtuan Francën, duke bllokuar rrugë dhe shkaktuar dëme të konsiderueshme materiale.
“Shiu filloi të mërkurën në mëngjes dhe deri pasdite ishte gjithçka në rregull. Por papritur uji vërshoi drejt nesh”, dëshmon një mësuese e zonës.
“U tmerrova shumë. Nuk kam parë asnjë herë një rritje kaq të shpejtë të nivelit të ujit. Kam jetuar këtu për 20 vite dhe kjo ishte hera e parë që përmbytemi”, Jean-Louis, një pensionist.
Autoritetet franceze i kanë bërë thirrje banorëve në jug të vendit që të kenë kujdes pasi parashikohet që shirat të vazhdojnë me të njëjtën dendësi. Paralajmërimi ishte më serioz për ata që gjenden në Korsikë. Me të njëjtën situatë janë përballur edhe Italia e Spanja.
Në këto dy shtete u shënuan 3 të vdekur dhe dëme të mëdha materiale. Pamje dramatike të publikuara nga mediat spanjolle shfaqin vërshimet e ujit ndërsa marrin përpara automjetet e parkuara në rrugë. Në Itali zona më e prekur ishte ajo Veriore, me pjesë të qytetit të Xhenovës që përjetoi përmbytje dhe rrëshqitje dheu.
