Ndryshe nga sa ishin pritshmëritë dhe nga sa ishin paralajmëruar, sot në Bularat të Dropullit kishte pak njerëz për ceremoninë 1 vjetorit të ekstremistit grek Kostandin Kacifas, i cili u qëllua për vdekje një vit më parë nga forcat RENEA. Ndër të tjera ra në sy edhe mungesa e ish-deputetit të LSI-së, Vangjel Tavo. Nuk dihet përse Tavo mungoi sot në Bularat, ku pati sërish thirrje antishqiptare nga disa ekstremistë të ardhur nga Greqia, por më së shumti nga nëna e Kacifas, e cila madje shkoi deri aty së kërkoi të rrëmbeheshin armët kundër nesh, na quajti gjithashtu edhe turqë. Megjithatë histeria e nënës së Kacifasit është fare banale dhe pa rëndësi.
E kuptueshme deri diku pasi kemi të bëjmë me një nënë që ka humbur të birin dhe sido që të ketë qenë Kacifas, ai mbetet i shtrenjti i saj. Por ky një vjetor i ekstremistit grek ka edhe një element tjetër të veçantë. Ish-deputeti Vangjel Tavo s’e gjeti kurrë kurajon të distancohej nga thirrjet antishqiptare që u hodhën një vit më parë në Bularat gjatë varrimit të Kacifas. “Benzinë dhe zjarr për qentë shqiptarë”, ishin disa prej thirrjeve të ekstremistëve. Tavo ishte aty, i dëgjoi dhe aprovoi në heshtje ato thirrje. Por më pas e deri më sot që është mbushur plot 1 vit nga ajo ngjarje, ish-deputeti i Gjirokastrës nuk guxoi të shkruante dy radhë në Facebook.
Thjesht t’i dënonte ato thirrje dhe të distancohej prej tyre. Kaq gjë Vangjel Tavo ia kishte borxh elektoratit të vet, në shumicë shqiptare, që e ka mbajtur në Kuvend si deputet për rreth 20 vjet. Kjo heshtje e tij është po aq e rëndë sa edhe vetë koret raciste të një viti më parë. Mbajeni shënim si rast kur Vangjel Tavo t’ju trokasë sërish në derë dhe t’ju kërkojë votën për t’u rifutur në Kuvendin e Shqipërisë. Kaq!
©argjiroja.net
