Dhunë në Kategorinë e Dytë, madje tashmë që gara sa vjen e bëhet më interesante, fushat e futbollit kthehen në arenë boksi. Kështu ka ndodhur sot, në sfidën e zhvilluar në Këlcyrë, mes vendasve dhe miqve nga Maliqi. Madje, një rast mjaft i rëndë kur Aristidh Coli ka goditur me grusht, duke e dëmtuar rëndë në nofull një nga lojtarët e Maliqit. Madje, spitali i Këlcyrës nuk e ka mbajtur dhe menjëherë është nisur drejt Gjirokastrës.
Sipas drejtuesve maliqar, gjatë gjithë ndeshjes ka pasur lojë të rëndë, sharje e shkelma, dhe sipas tyre tashmë Këlcyra duhet që të marrë një dënim të rëndë.
Kjo është një ngjarje shumë e rëndë dhe që çdo vit përsëritet dhuna në Këlcyrë, por masat kanë qenë kalimtare, e madje kanë përfituar edhe amnisti, si fusha, zyrtarët apo dhe lojtarët! Federata Shqiptare e Futbollit duhet urgjentisht të përjashtojë ekipin e Këlcyrës nga cdo garë sportive.
Dhuna në fushën e lojës është e papranueshme, sporti s’ka lidhje me dhunën e huliganëve brenda e jashtë fushe. Një rast i ngjashëm dhune si ky ndodhi edhe vjet. Por FSHF i zbuti sërish masat ndëshkimore. Kjo histori me Këlcyrën duhet të marrë fund. Përjashtoni ekipin derisa të zënë mend që futbolli nuk është boks.
©argjiroja.net
