Prej dy ditësh një patrullë e Policisë Rrugore e ardhur nga Tirana është vendosur në rrugën nacionale Gjirokastër-Kakavijë, pranë fshatit Terihat të Dropullit. Oficerët e kësaj patrulle monitorojnë me radarë drejtuesit e automjeteve që tejkalojnë shpejtësinë teksa janë në timon. Burime të Argjirolajm.net thonë se deri më tani janë vendosur një numër i konsiderueshëm gjobash, si dhe janë pezulluar patentat për shoferët që kanë qenë me shpejtësi mbi normat e lejuara në këtë segment.
Sikundër thonë burimet, ka patur edhe raste që oficerët kanë ‘mbyllur sytë’ përballë shkelësve, duke mos i ndëshkuar për shkak të ndërhyrjeve apo lidhjeve të shkurtra. Natyrisht që nuk përjashtohet këtu as ryshfeti, sic kemi parë në fakt të ndodhë shpesh në Shqipëri. Megjithatë apriori nuk mund të paragjykojmë këtë patrullë e as ta akuzojmë se përse është duke bërë punën e vet. Ky raportim i joni nuk është në fakt një paralajmërim për shoferët që të bëjnë kujdes teksa afrohen në Terihat sepse aty janë policët me radarë.
Respektimi i shenjave të qarkullimit rrugor, vendosja e rripit të sigurimit dhe shpejtësia brenda normave nuk duhet bërë nga frika e policëve, por për të qenë të sigurt për veten tuaj dhe për përdoruesit e tjerë të rrugës. Shpejtësia vret! Mos harroni cfarë ndodhi të dielën në mbrëmje. Për shkak të shpejtësisë së lartë, u aksidentua dhe ndërroi jetë në vend një djalë 17-vjecar në Gjirokastër.
©argjiroja.net
