Në Bagdad ka nisur dita e parë e funeralit të gjeneralit iranian, Qasem Soleimani. Turma e madhe thërriste: Vdekje Amerikës. Shumë njerëz në rrjetet sociale janë të shqetësuar për situatën. Eksperti i njohur i BBC, Jonathan Marcus u kthen përgjigje disa prej pyetjeve më të zakonshme në rrjet këto orë
A do shpërthejë Lufta e Tretë Botërore?
Kjo nuk do nxisë Luftën e Tretë Botërore. Aktorët kryesorë që mund të përfshihen në një konflikt të tillë, si Rusia dhe Kina, nuk janë lojtarë të rëndësishëm në këtë dramë. Por ky mund të jetë një moment përcaktues për Lindjen e Mesme dhe rolin e Uashingtonit në të. Mund të pritet një hakmarrje domethënëse e Iranit dhe kjo do çojë në një cikël veprimesh dhe reagimesh që mund t’i afrojnë dy vendet edhe më shumë drejt një konflikti të plotë.
A është e ligjshme të vritet dikush si ky sipas ligjit ndërkombëtar?
SHBA argumenton se Soleimani ishte përgjegjës për sulmet e paprovokuara ndaj forcave amerikane në Irak. Këto forca janë aty me kërkesë të qeverisë së Irakut. Por ekspertja e njohur e kësaj fushe, profesoresha Mary Ellen O’Conell, thotë: “Vetëmbrojtja paraprake nuk është kurrë një justifikim për vrasjen. Asgjë nuk është. Karta e Kombeve të Bashkuara, e përcakton vetëmbrojtjen si të drejtën për t’iu përgjigjur një sulmi të armatosur aktual dhe domethënës”.
A ekziston rreziku që Irani të pëdorë përgjigjen bërthamore?
Jo. Irani nuk ka program të armëve bërthamore, edhe pse ka disa elementë që mund të kontribuojnë në këtë program.
Cili është roli i SHBA dhe Iranit në Irak?
Irani është një aleat i ngushtë i qeverisë shiite të Irakut. Po ashtu është një aktor domethënës në vend, duke punuar me anë të grupeve të milicisë. SHBA nga ana e saj ka 5 mijë trupa në Irak, që kujdesen për këshillimin dhe stërvitjen e ushtrisë irakiane në përpjekje për të luftuar elementët e Shtetit Islamik.
Në thelb, dy lojtarë të jashtëm- SHBA dhe Irani- po manovrojnë kundër njëri-tjetrit në Irak.
