Kërkesat për azil nga shqiptarët në shtetet e Bashkimit Europian në vitin 2019 ishin 5 deri 15-fish më të larta sesa fqinjët e Ballkanit. Shtetet me flukse më të larta të azilkërkuesve shqiptarë janë Gjermania, Franca dhe Mbretëria e Bashkuar.
Mijëra shqiptarë vazhdojnë të tentojnë çdo vit strehimin në vendet e Bashkimit Europian për shkaqe ekonomike dhe politiko-sociale.
Kërkesat nga azilkërkuesit shqiptarë në shtetet e BE-së u rritën me 7 për qind në vitin 2019 nga viti i kaluar.
Sipas Agjencisë Europiane për Mbështetjen e Azilit, në nivel vjetor totali i aplikimeve për herë të parë arriti në 20,256, me një mesatare prej afro 1,700 aplikimesh për azil çdo muaj.
Në nivel rajonal, numri i azilkërkuesve nga Shqipëria ishte pesëfish më i lartë sesa ata nga Serbia, që raportoi rreth 3,900 aplikime për azil, Kosova 2,765, Maqedonia e Veriut 2,680, dhe Bosnjë-Hercegovina, 1,313.
Në rastin e Shqipërisë, autoritetet refuzuan mbi 94 për qind të kërkesave për status refugjati dhe për mbrojtje sipas të drejtave ndërkombëtare të njeriut.
Kjo përqindje për vendet e rajonit ishte më e ulët, vetëm 1 për qind kërkesa të pranuara për azil.
Listën e përgjigjeve pozitive sipas përqindjes së aplikimeve e kryesuan të ardhurit nga vendet në luftë, sirianët dhe jemenasit.
Në vitin 2019, kërkesat për azil nga e gjithë bota në vendet e BE-së u rritën me 13 për qind në mbi 700 mijë.
Aplikimet më të shumta erdhën nga sirianët dhe afganët, por mes 10 kombësive kryesore ishin edhe turqit, iranianët, nigerianët dhe shqiptarët.