Zv. trajneri i Luftëtarit, Marko Jovanoviç, ka shprehur hapur acarimin në radhët e gjirokastritëve për ndryshimin e datës së ndeshjes ndaj Partizanit. Në konferencën e sotme për shtyp, ai i kërkoi FSHF-së të mos veprojë me dy standarte, pasi Luftëtari ka luajtur në qytete të tjera kur nuk e kishte gati stadiumin, ndërsa tani plotësohen tekat e Partizanit për të luajtur në “Selman Stërmasi”.
Për ndryshimin e datës së ndeshjes ndaj Partizanit
“Dua të theksoj që atmosfera në skuadër është e mirë por jemi përballë një problemi shumë të madh sepse data e ndeshjes ndryshoi vetëm pas stërvitjes tonë të fundit dhe kjo nuk është serioze. Ne hartojmë një program dhe duhet të dimë ku dhe kur luajmë.
Lojtarët kanë bërë një seancë me ngarkesë të madhe fizike dhe nuk kanë pasur kohë për t’u rikuperuar në prag të kësaj sfide, kështu që ky vendim na ka krijuar jo pak probleme dhe të gjithë lojtarët nuk janë në gjendje optimale për këtë takim.
Nuk më pëlqen që FSHF përdor dy standarte sepse kur ne nuk kishim stadium, detyroheshim të luanim në Peqin apo Elbasan, ndërsa tani detyrohemi të plotësojmë tekat e Partizanit për të luajtur në ‘Selman Stermasi’, në një kohë që nuk është e mundur një gjë e tillë.”
Për gjendjen e skuadrës
“Skuadra është e plotë. Vetëm Ramadani nuk mund të luajë në këtë ndeshje. E ritheksoj se jemi përgatitur për të luajtur të dielën dhe mund të kemi probleme por do të shkojmë në “Selman Stërmasi” për të shënuar një gol më shumë se Partizani.”
Për humbjen në Kukës
“Luajtëm një ndeshje të mirë por ishim të pafat. Me siguri që kemi mësuar nga gabimet që bëmë në Kukës. Nuk dua të gjej alibi por goli i dytë i tyre ishte në pozicion të dukshëm jashtë loje. Është e sigurt që gjatë gjithë javës jemi munduar të korrigjohemi”.
