Një nismë interesante është ndërmarrë në Gjirokastër nga Shoqata Multifunksionale për Kulturë, Edukim dhe Zhvillim teksa i gjithë vendi ndodhet në karantinë nga frika e përhapjes së koronavirusit. Sot në mesditë përreth stadiumit të qytetit dhe tek fasadat e disa pallateve janë shpalosur banderola me mesazhe sensibilizuese për qytetarët e Gjirokastrës, në mënyrë që ata të qëndrojnë brenda për të mbrojtur veten dhe familjen nga Covid-19.
“Respekto orarin e lëvizjes”, “Respekto distancën”, “Mbro veten dhe të tjerët”, “Ndihmoni më të moshuarit” etj, ishin disa nga mbishkrimet e banderolave. Po kështu kishte edhe mbishkrime me fjalë falenderuese për mjekët, infermierët dhe Policinë e Shtetit që janë në vijën e parë të rrezikut që kanoset nga koronavirusi.
Banderolat do të qëndrojnë aty për disa ditë, me shpresë se do të shërbejnë për të ndërgjegjësuar akoma më tej qytetarët që duhet të respektojmë masat drastike të ndërmarra nga qeveria sepse vetëm në këtë mënyrë mund të mposhtet virusi i rrezikshëm. Shoqata Multifunksionale për Kulturë, Edukim dhe Zhvillim në Gjirokastër drejtohet nga Loreta Mamani, pedagoge në Universitetin e Gjirokastrës.
©Argjirolajm.net
