Luftëtari rikthehet të luajë në shtëpi pas fitores bindëse 4-0 të arritur ndaj Korabit, ndërsa këtë herë do të përballet me gjashtë herë kampionët e Shqipërisë. Në orën 16:00, të dielën në tapetin e blertë të stadiumit “Gjirokastra”, bluzinjtë do të synojnë si në çdo përballje radhe rezultatin pozitiv, edhe pse do t’u duhet të sfidojnë Skënderbeun e kualiteteve.
Dhe, si për të rikonfirmuar edhe njëherë se Luftëtari i Milinkoviçit nuk është rastësisht me një këmbë drejt Europës, gjirokastritët nuk humbasin kohë dhe vijojnë me normalitet përgatitjet për takimin e javës së 31-të.
STËRVITJA
E programuar për të filluar në orën 16:00, seanca e pasdites ka nisur më shumë se 15 minuta më herët. Mes humorit dhe batutave, futbollistët pa praninë e treshes Milinkoviç-Jovanoviç-Musiaris nuk janë vonuar për të ledhatuar topin. Me një lab si Lejdi Liçaj, dozat e humorit s’mund të mungonin.
“Unë i them arbitrit kështu është e vërteta, por ai nuk bindet. Unë nuk merrem me ty i thashë gjyqtarit”, tha Liçaj, por nuk u kuptua kujt iu referua. Mes 24 futbollistëve të pranishëm, ka startuar seanca e pasdites së djeshme para një numri të konsiderueshëm tifozësh. Të ndarë në katër grupe, gjirokastritët u vendosën në gjysmën e fushës së drejtuar nga Milinkoviç, i cili dje kishte veshur një kostum blu dhe mbante një kapelë të zezë.
Gjatë aksioneve të stërvitjes, ai i motivonte lojtarët duke u thënë se po krosonin mirë, në gjuhën angleze. Mirëpo, përveç fjalëve të tij, dëgjoheshin edhe thirrjet mes lojtarëve. Aleksi shpeshherë i drejtohet kapitenit Beqiri me shkurtimin Beqo. Aleksi ngacmon gjithashtu edhe mbrojtësin Liçaj. “Më çmende o Babi (i referohet mbrojtësit), më çmende”, thotë Aleksi. Humori duket shumë pozitiv te Luftëtari që do të kërkojë rezultat pozitiv me Skënderbeun.
