Kryeministri Edi Rama komentoi në përfundim të takimit të Këshillit Politik bojkotin e PD dhe LSI. Ai u shpreh se koha e mbetur është shumë e shkurtër dhe se opozita jashtëparlamentit është një realitet politik. Nga ana tjetër Rama tha se risitë kushtetuese janë edhe në interesin e Partisë Demokratike.
“Erdhëm sot për të shprehur jo vetëm vullnetin, por edhe gatishmërinë për të diskutuar mbi çdo gjë që është e paqartë dhe që ka krijuar keqkuptim lidhur me pasojat e risive kushtetuese. Në këndvështrimin tim është në interesin e Partisë Demokratike që ta zhvillojmë këtë proces sepse faktikisht Këshilli Politik e ka përfunduar misionin e vet me marrëveshjen e 5 qershorit. Dhe pas 30 korrikut jeta politike vazhdon…
Kështuqë do të na duhet të reflektojmë në ligjin zgjedhor çfarë Kushtetuta do të imponojë për listat e hapura. Më duket absurde bojkoti i tryezës ku diskutohet kjo. Mosekzistenca imagjinare e PD për Parlamentin nuk e bën Parlamentin inekzistent.
Kjo tryezë është ndërtuar si vetëdije nga ana jonë se pavarësisht faktit që PD dhe aleatët u arratisën në drejtim të paditur duke braktisur detyrën, ata janë pjesë e një realiteti politik. Është një kohë shumë e shkurtër dhe jam i keqardhur.
Ne nuk jemi në kushtet e ndonjë shtrëngese apo halli, madje përkundrazi. Tani kemi konsensus me forcat parlamentare. Me ligj dhe me zakon nuk kemi ndonjë hall të posaçëm. Por mendoj se kemi bërë gjënë e duhur” – tha Rama. Ai shtoi se Partia Demokratike po përsërit gabimet e së shkuarës duke i braktisur tryezat e dialogut.
“Kam frikë se ata po bëjnë gabimet e së shkuarës që nuk janë asnjëherë në vendin e duhur dhe në kohën e duhur” – tha Rama.
Ai siguroi se ajo marrëveshje nuk do të preket as nga ndryshimet kushtetuese pasi përmbajtja e saj nuk preket nga asgjë dhe këtë e kanë konstatuar edhe ekspertët në Këshillin Politik.
”Ajo që kemi diskutuar me ekspertët në atë pjesë të shkurtër në mbledhje ka qenë adresimi i çështjeve, që u ngritën dje. Në një prej tyre ishte dhe kjo çështje. Këtu ekspertët kanë dhënë një përgjigje shteruese. Që asgjë nuk preket në përmbajtjen e marrëveshjes së 5 qershorit, asgjë. Reflektimi në ligjin zgjedhor i risive kushtetuese është diçka tjetër. Dhe nëse reflektimi do të kërkojë që të plotësohet një nen kur ndërkohë ka një nen të marrëveshjes, kjo s’ka të bëjë fare, është absurditet. Marrëeshja e 5 qershorit votohet nesër. Në 30 qershor do të votohen ndryshimet kushtetuese. PD s’ka çfarë pret nga Këshilli lidhur me çështjet që ka ngritur.”– tha Rama.
