Parlamenti Europian ka bërë thirrje për sanksione ndaj presidentit bjellorus, Aleksander Lukashenko dhe në të njëjtën kohë ka dënuar shtypjen e dhunshme të demonstruesve. Në një rezolutë të miratuar sot me 574 pro, 37 kundra dhe 82 abstenime, Parlamenti Europian hodhi poshtë rezultatet zyrtare të të ashtuquajturave “zgjedhje presidenciale” që u zhvilluan në Bjellorusi në 9 gusht, pasi sipas anëtarëve të parlamentit, ato u mbajtën në shkelje flagrante të të gjitha standardeve të njohura ndërkombëtarisht.
”Sapo të skadojë mandati i udhëheqësit autoritar në largim Aleksander Lukashenko më 5 nëntor, Parlamenti nuk do ta njohë më atë si president të vendit”, thuhet në rezolutën e PE.
Ndonëse vota e Parlamentit Evropian nuk është ligjërisht e detyrueshme për vendin, ajo mbart peshë politike dhe mund të ndikojë në mënyrën se si BE investon në Bjellorusi ose jep mbështetje financiare.
