Luftëtari kërkon fitoren e parë sezonale në shtëpi. Dhe, për të realizuar këtë objektiv, duhet të kalojnë pikërisht Kamzën, që është kundërshtari i javës së 5-të. Ditët e ndërprerjes së kampionatit kanë shërbyer që kontingjenti i lojtarëve të rigjejë formën më të mirë, megjithatë 11-shja mbetet “peng” e Kristal Abazaj.
Miraka do të blindojë portës, ndërsa defensiva do i besohet Toledos, Beqirit, Rrapës, Rrapos. Aleksi, Ramadani, Rroca do të rreshtohen në mesfushë. Sulmi pritet të nisë me Lamçen në të djathtë, Bregu në të majtë dhe Nunjez në qendër. Gjithsesi, gjithçka varet edhe prej Abazajt, nëse ai do të jetë gati, atëherë ofensiva do të ndryshojë. Gjithsesi performanca e Lamçes në ndeshjet e luajtura, edhe pse i aktivizuar disa herë në majë të sulmit të Luftëtarit, e përligj besimin ndaj tij.
Seancës së pasdites së djeshme, veç stërvitjes, ka pasur edhe festë. Albano Aleski bëri 25 vjeç dhe ndarja e tortës u shoqërua edhe me urime. Nuk mund të mungonin batutat për shtatshkurtrin e Luftëtarit, ku më e veçanta ishte ajo e Zguros, i cili i tha: “Ta gëzosh 35 vjetorin!”.
