Për autorin 60-vjeçar të vrasjes së katërfishtë të familjes shqiptare në Andravidë i ndodhur tashmë në paraburgim në Korydallos, informacione të reja dalin në dritë për lëvizjet e tij pas krimit, arrestimin dhe vendndodhjen e tij të fshehur në Patras.
Punonjësit e policisë që e trajtuan rastin dhe ranë në kontakt me autorin, e cilësojnë atë si “të egër”, një person mizor dhe të pamëshirshëm, i cili, ndonëse e dinte se laku po i ngushtohej nga momenti në moment, sfidoi rrezikun dhe tentoi të kthehej në shtëpi në Andravidë. Qëllimi i tij ishte të merrte – 15 mijë euro që kishte aty dhe të zhdukej. Sipas pelop.gr, pas krimit, ai u përpoq t’i afrohej shtëpisë së tij duke udhëtuar me kilometra gjatë natës, duke zgjedhur një rrugë “të paeksploruar” që fshihte shumë surpriza, duke përfshirë kënetat.
Ai ishte kujdesur që makinën 4×4 ta fshihte në një zonë të shkretë me kallamishte. Në mbrëmjen e vonë të së njëjtës ditë, teksa lëvizte me makinën e tij në Patras – Pirgos u pikas nga policia e cila e nisi ta vëzhgonte. Duke u nisur për në Patras itenerari i tij paraprihej nga një mjet që mësohet se funksiononte si tregues, për çdo rast të përballjes me policinë. Më në fund u ndalua nga forca të shumta policie në orët e para të së shtunës, tre ditë pas ngjarjes makabre në Eleftherios Venizelos në afërsi të stadiumit Pampeloponnisia, dhe nuk bëri asnjë rezistencë.
Sipas të njëjtit burim, kur kuptoi se nuk kish mundësi për t’u larguar nxorri duart nga dritarja e shoferit dhe i tundi në shenjë “dorëzimi”. Më vonë ai do të tregojë në polici se kishte frikë se mos e pushkatonin, kishte frikë se mos vritej (!). “Çfarë mund të bëja; “Ti më hidhje të paktën 50 plumba”, dyshohet të ketë thënë autori. Në momentin kur u kap ishte i veshur vetëm rroba të brendshme, të cilat i kishte të lagura dhe tërë baltë që sipas tij, disa orë më parë i kishte bërë gjatë rrugës për në shtëpi. I kishte nxjerrë dhe po mundohej t’i thante me radiatorin e makinës (!). Fillimisht u çua në Policinë e Patrës, ku gjatë pyetjeve të policisë mësohet të ketë thënë “pse ma bëtë këtë? “Pse nuk më kapët më herët?” Prezencën e policisë krimineli i Andravidës e kishte vënë re në 6-7 km të fundit të itinerarit.
60-vjeçari gjatë qëndrimit në Patras, fshihej në një varkë të braktisur në zonën bregdetare të Politeknikut Iroon, pak përpara Klubit të Lundrimit. Ai i tregoi vendin policisë ndërsa mohoi kategorikisht se ishte pritur në shtëpinë e një miku, fakt që nuk del nga hetimi i policisë. Ai dilte nga vendi i fshehjes vetëm për gjërat e nevojshme, ndërsa ishte kujdesur që të hiqte qafe armën, nga frika se mos binte në një kontroll të rastësishëm të policisë dhe i zbulohej identiteti. Ai e fshehu armën në një banesë të një pallati, çelësat e së cilës i zotëronte, kur ish-partnerja e tij jetonte aty.
