Aksidenti tragjik në Muzinë ku humbën jetën 5 persona mbase edhe mund të ishte shmangur nëse rruga do të ishte e kompletuar me të gjithë elementët e sigurisë. Natyrisht që gabimi i mundshëm njerëzor i shoferes së fuoristradës, Rexhina Çelhaga, apo edhe i shoferit të ndjerë të furgonit, Bardhi Proda, nuk përjashtohen të kenë ndikuar në këtë tragjedi. Por është fakt që aty ku ndodhi ngjarja e rëndë rruga nuk kishte mbrojtëse anësore. Guardielat metalike apo barrierat prej betoni mungonin.
Po kështu as vijëzimi që ndan dy korsitë e rrugës nuk ekzistonte. Nëse do të kishim këto elementë, aksidenti nuk do të ishte shndërruar në tragjedi, makina nuk do dilte nga rruga e ndoshta kishim më pak jetë të humbura ose asnjë. Dhe siç ndodh shpesh në këto raste në Shqipëri që autoritetet kujtohen për masat e sigurisë sa herë ndodh ndonjë aksident, edhe kësaj radhe te nesërmen e aksidentit u vendosën treguesit fosforeshentë në anë të bankinës, por jo barrierat mbrojtëse. Probleme me sinjalistikën dhe barrierat mbrojtëse ka pothuajse në të gjithë gjatësinë e rrugës Jorgucat-Sarandë. Dhe një Zot e di se deri kur do të marrë fund neglizhenca dhe papërgjegjshmëria institucionale për të rritur sigurinë rrugore. ©argjiroja.net
