Një kaos i vërtetë te Luftëtari, ku situata duket më e trazuar se kurrë. Presidenti Grigor Tavo ka deklaruar pas ndeshjes me Flamurtarin se do të tërheqë skuadrën nga kampionati nëse situata nuk ndryshon pas paraqitjeve të dorëheqjes nga shefi i klubit dhe trajneri Milinkoviç. Në një intervistë për “SuperSport”, Tavo u shpreh se ndihet i pikëlluar pasi ai nuk shet ndeshje dhe kjo situatë është e papranueshme:
“Nuk jam i mërzitur, jam i pikëlluar. Është hera e dytë që investoj në futboll. Unë shes produkte, nuk shes ndeshje. Më kanë paraqitur dorëheqjen trajneri dhe shefi i klubit me arsyetimin që nuk po e mbroj dot punën e tyre nga padrejtësitë dhe turpet kundër Luftëtarit. Po si mund ta mbroj unë vallë? Unë nuk veproj me dhunë dhe presione si disa të tjerë, me telefonata arbitrash. Unë nuk jam i tillë, Gjirokastra nuk është e tillë. Unë doja të mos ndalonim punën e nisur dhe nuk doja të pranoja që skuadra ime të nënshtrohej ndaj këtij sulmi. Skuadra për të cilën kam investuar 1 milionë euro në këto dy vite, nuk do të ulë kokën të pranojë këto absurde. Nuk po shkatërrohet një skuadër, por shkatërrohet një familje dhe tani që po shkruaj jam me lot në sy. Do të komunikoj nesër me trajnerin dhe shefin e klubit. Unë nuk mund të ndikoj dot te arbitrat. Nëse ata brenda javës nuk kthehen, unë atëherë do të tërheq ekipin nga gara, kësaj radhe me të vërtetë i pikëlluar. Po e theksoj sepse nuk është vetëm lek i humbur ky që po hedh, por u shkatërrua një punë e shkëlqyer të cilën e vlerësoi e gjithë Shqipëria”, ka deklaruar Grigor Tavo.
