Nga Fatmir Popja
Mbrëmjen e së shtunës u zhvillua finalja e madhe e Kampionatit Europian për 21-vjeçarë mes Anglisë dhe Gjermanisë, dy superfuqi të futbollit europian. Në një ndeshje dramatike dhe të luftuar deri në sekondat e fundit, “Tre Luanët” e Anglisë triumfuan 3-2 pas kohëve shtesë duke mbrojtur titullin dhe shpallur për herë të dytë radhazi kampionë Europe në këtë kategori moshe.
Por përtej rezultatit, kjo finale mbarte një tjetër moment historik për shqiptarët, dy sulmues me origjinë shqiptare, Brajan Gruda dhe Nelson Weiper, ishin titullarë në vijën e parë të sulmit për Gjermaninë U-21 duke dhënë një paraqitje mbresëlënëse dhe shkëlqyen në skenën më të madhe të futbollit europian për të rinjtë.
-Shqiptarë në zemër të “panzerave”
Nuk kishte ndodhur më parë që dy shqiptarë të ishin titullarë në finalen e një Europiani me fanellën e Gjermanisë. Të dy të rinjtë treguan vlera të larta teknike dhe vendosmëri në një ndeshje të tensionuar, ku sulmi gjerman ishte ndër më aktivët. Brajan Gruda, 21 vjeç, një nga emrat më të përfolur të momentit, luan me Brighton në Premier League. Ai është një sulmues i majtë modern, teknik dhe eksploziv i cili prej muajsh mbetet në radarët e trajnerit të kombëtares shqiptare, Sylvinho i cili ka shprehur interesim për ta bindur të përfaqësojë Shqipërinë në të ardhmen. Nelson Weiper, 20 vjeç, i lindur në Mainz dhe pjesë e skuadrës gjermane me të njëjtin emër ishte protagonisti kryesor në këtë finale. Me fanellën nr. 19, Weiper shënoi një gol të bukur në minutën e parë shtesë të pjesës së parë duke rihapur ndeshjen pas avantazhit të hershëm të Anglisë. Ai dha një performancë dominuese në ajër dhe u tregua vendimtar në çdo kontakt me topin.
-Një finale klasike, një rikthim i historisë
Kjo ishte herë e dytë që Anglia dhe Gjermania përballen në një finale të Euro U-21, pas përballjes së vitit 2009, ku kishte triumfuar Gjermania. Këtë herë, historia u shkrua ndryshe. Anglia kaloi në epërsi që në minutën e 17-të me golin e Palmer, por Weiper rihapi lojën në fundin e pjesës së parë. Gjermanët barazuan me një supergol të Nebel në minutën e 61-të dhe pas përfundimit në barazim 2-2 të kohës së rregullt ndeshja shkoi drejt kohëve shtesë. Rowe shënoi golin vendimtar për Anglinë në minutën e 92-të, duke e çuar rezultatin në 3-2 në fillim të shtesës së parë, rezultat ky që nuk ndryshoi deri në mbyllje të 120 minutave lojë dhe Anglia me meritë u shpall Kampione e Europës për U-21.
–Të ardhme shqiptare me dyshen Gruda–Weiper?
Ndërsa e gjithë Europa pa me admirim paraqitjen e tyre, çështja e përfaqësimit ndërkombëtar mbetet ende e hapur për të dy lojtarët me rrënjë shqiptare. Gruda, i lindur në Gjermani nga prindër shqiptarë, nuk e ka bërë ende debutimin me ekipin e parë të Gjermanisë dhe mbetet në orbitën e FSHF-së. E njëjta situatë edhe për Weiper, i cili gjithashtu ruan të drejtën për të përfaqësuar Shqipërinë, nëse nuk aktivizohet me kombëtaren A të Gjermanisë në ndeshje zyrtare. Finalja e Euro U-21 në Bratislavë nuk ishte vetëm një ngjarje e rëndësishme për futbollin europian, por edhe një moment krenarie për shqiptarët kudo që ndodhen, dëshmi se talenti shqiptar lulëzon dhe shkëlqen edhe në elitën e futbollit botëror.
(BalkanWeb)
