Shumë spektakël sonte në Santiago Bernabeu dhe shumë emocione Një çerekfinale që do të mbahet mend gjatë në botën e futbollit. Juventus ka bërë njërën prej paraqitjeve më të mira në Ligën e Kampionëve në ndeshjen e dytë në çerekfinale të Ligës së Kampionëve. E tërë kjo duket se ka ardhur nga frymëzimi që juventinët e morën nga ndeshja e mbrëmshme ku Roma eliminoi Barcelonën.
Të gjithë menduan se gjithçka kishte përfunduar pas asaj humbjeje turpëruese 0-3 në ndeshjen e parë në Torino, por Juventusi u zgjua dhe shënoi 3 herë në 90 minutat e kohës së rregullt në “Bernabeu”, por në minutat e shtesës, i përhershme Ronaldo zgjoi bardhezinjtë nga ëndrra, duke realizuar nga pika e penalltisë.
Juventus filloi rikthimin shumë herët, që në minutën e parë ku shënoi Mario Mandzukic. Mandzukic ishte autor edhe i golit të dytë, të cilin po ashtu e shënoi me kokë. Pjesa e parë përfundoi me rezultat 2-0 për Juventusin. Në pjesën e dytë prapë Juventus e filloi më mirë. E kjo paraqitje iu shpërblye pasi goli i barazimit erdhi në minutën e 61’të. Real Madrid pas këtij goli ishin shumë më mirë dhe u përpoq të shënojë, por Buffon ishte fenomenal në pritje sonte. E kjo ju shpagua pasi në fund të takimit akordohet një penallti për Realin, të cilën në gol e shndërron Ronaldo.
