Një 50-vjeçare me inicialet B.M përfundoi mbrëmjen e sotme në prangat e Policisë së Sarandës, pasi u kap duke trafikuar të miturin nga Bathorja, që ishte në kërkim nga familja prej 2 ditësh. Policia bën me dije se i mituri është një nxënës i klasës së gjashtë, me banim në Bathore të Tiranës. 12-vjeçari ishte shpallur prej dy ditësh i zhdukur nga familjarët.
Prindërit e vogëlushit, kërkuan ndihmën e emisionit “Me Zemër të hapur”, në “News 24” për të gjetur djalin. Po ashtu babai i të miturit ka apeluar në rrjetet sociale për ndihmë, duke deklaruar se djali i tij ishte larguar nga banesa pa asnjë njoftim. Babai i 12-vjeçarit është shfaqur i përlotur gjatë apelit të tij në media duke treguar se nuk ishte hera e parë që i biri është larguar nga banesa.
Njoftimi i plotë
Nga Specialistë për Hetimin e Krimit në Komisariatin e Policisë në Sarandë u bë arrestimi në flagrancë i shtetases B. M, 50 vjeç, banuese në lagjen nr. 1 Sarandë, pasi në orën 14.30 të datës 06.07.2021 në lagjen nr. 1 Sarandë, u kap duke trafikuar shtetasin e mitur, R. G. T. 12 vjeç, nxënës i klasës së gjashtë, banor në lagjen Nr 6, Bathore, Tiranë. Materialet iu referuan Prokurorisë së Rrethit Gjyqësor Sarandë për hetime të mëtejshme.
