Kryhet ekstradimi i shqiptarit të kërkuar ndërkombëtarisht për vrasje nga Shqipëria që dje u arrestua në Greqi.
Policia informon se ai është 50-vjeçari Arben Muça nga Tirana që 22 vite më parë në Kombinat ka kryer një vrasje afër një bilardoje. Ai u kap dje në Lamia teksa prej kohësh fshihej në territorin grek. Gjykata e Tiranës e ka dënuar me 23 vite burg këtë person për vrasje dhe armëmbajtje pa leje.
NJOFTIMI NGA POLICIA
Interpol Tirana
Finalizohet me sukses një tjetër bashkëpunim mes Interpol Tiranës dhe Interpol Athinës.
Falë shkëmbimit të informacionit, lokalizohet dhe vihet në pranga në Lamia, Greqi, një i kërkuar për vrasje në Shqipëri. Në kuadër të bashkëpunimit mes Zyrës Qendrore Kombëtare Interpol Tirana dhe Interpol Athinës, pas shkëmbimeve të vazhdueshme të informacioneve të grumbulluara nga Departamenti i Policisë Kriminale për vendndodhjen e një të kërkuari për vrasje, i cili fshihej në territorin grek, ditën e djeshme Policia greke, ka finalizuar kapjen dhe arrestimin e shtetasit shqiptar, me qëllim ekstradimin e tij drejt vendit tonë, konkretisht shtetasin Arben Muça, 50 vjeç, banues në Tiranë.
Përmbledhje e ngjarjes së ndodhur:
Ky shtetas, në vitin 1998, në Kombinat, Tiranë, në rrugën “Kelmendi”, në afërsi të një bilardoje ka vrarë me armë zjarri shtetasin M. T.
Gjykata e Rrethit Gjyqësor Tiranë e ka dënuar me 23 vjet burg, për veprat penale “Vrasja me paramendim” e kryer në bashkëpunim dhe “Armëmbajtja pa leje”.
Zyra Qendrore Kombëtare Interpol Tirana po vijon procedurat e mëtejshme për ekstradimin e shtetasit Arben Muça drejt vendit tonë.
