Arsenali sovjetik i shteruar, Rusia mbështetet gjithnjë e më shumë te Kina dhe Koreja e Veriut

Pas më shumë se tre vitesh e gjysmë lufte në Ukrainë, Rusia thuajse ka shteruar rezervat e saj të armëve nga epoka sovjetike dhe po detyrohet t’i drejtohet aleatëve të saj në Azi për të mbajtur gjallë makinerinë ushtarake.
Sipas të dhënave të Institutit KSE (Shkolla e Ekonomisë së Kievit), Rusia është bërë gjithnjë e më e varur nga Kina për komponentë industrialë dhe nga Koreja e Veriut për furnizime me municione.
Financial Times raporton se 40% e municioneve që përdoren aktualisht nga forcat ruse në Ukrainë vijnë nga Koreja e Veriut, sipas kreut të inteligjencës ushtarake ukrainase, Kirill Budanov.
Në vitin 2025, Koreja e Veriut ka dërguar mbi 28,000 kontejnerë në Rusi, ndërsa dërgesat nga porti i Nakhodka-s janë rritur në mbi 250,000 ton – një rritje dramatike, duke pasur parasysh se para vitit 2022 ato ishin zero.
Ndërkohë, Rusia vazhdon të përdorë mjete të vjetra të tilla si tanket T-72 dhe T-80 të prodhuara që nga vitet 1970, dhe madje edhe modele më të vjetra si T-54, për shkak të mungesës së pajisjeve moderne.
Kjo varësi në rritje nga vendet si Kina dhe Koreja e Veriut vë në dukje vështirësitë e mëdha logjistike dhe ekonomike me të cilat po përballet industria ruse e mbrojtjes, ndërsa lufta në Ukrainë vijon pa një fund të afërt.