“Në Gjirokastër morëm një pikë me shumë vlerë”, kështu është shprehur Florind Bardulla. Barazimi duket se ka rikthyer qetësinë te Vllaznia për të vazhduar garën e mbijetesës. Një gjë të tillë e pranon edhe mesfushori shkodran, ndërsa e cilëson rezultatin e së shtunës si më të drejtin.
“Një barazim në një fushë të tillë, përballë një kundërshtari të tillë, është një rezultat pozitiv për ne. Ishte një lojë me dy tablo. Në pjesën e parë, ekipi vendës ishte më superior ndaj nesh dhe na vuri në vështirësi. Ndërsa të dytën mendoj se, me pak fat dhe nëse do të ishin më të qetë para porte, mund të kishim fituar. Gjithsesi, edhe mund të humbisnim, pasi ishte një përballje e luftuar deri në minutat e fundit.
Ndaj them që barazimi ishte rezultati më i drejtë. Një pikë që për ne vlen jo vetëm për moral, por edhe për vazhdimësinë në kampionat. Si janë punët në tabelën e klasifikimit, një pikë mund të vlejë shumë kur të vijë finishi i këtij sezoni. Nga vendi i 4-t e deri në të 9-in, ekipet janë të ngjeshur. Megjithatë, mendoj se po tregojmë se jemi në rrugën e duhur për të shpëtuar”, tha për “Panorama Sport” Bardulla.
Laçi
Vllaznia këtë fundjavë ka një tjetër “provim” të vështirë. Përballë do të ketë ekipin e Laçit, që në dy fazat e para u ka marrë pikët maksimale kuqebluve.
“Tani kemi mundësitë më të mira për të parë përpara dhe për të hedhur hapa të mëdha drejt sigurimit të mbijetesës. Pavarësisht se ka ende shumë kohë, por unë do të thosha se, nëse marrim maksimumin në dy takimet që do të kemi në shtëpinë tonë me Laçin e Teutën, do të ishim më të sigurt. Megjithatë, të dy këto takime mbeten të forta, ndaj duhet që t’i marrim një nga një.
Laçi është një ekip i fortë dhe këtë sezon na ka marrë maksimumin e pikëve në të dyja fazat. Duhet që të bëjmë kujdes. Na duhet fitorja, pasi çdo rezultat tjetër në këtë takim do të ishte fatal. Megjithatë, mendoj se me formën dhe besimin që kemi kësaj here do të arrijmë ta mposhtim Laçin, edhe pse e dimë që janë forcuar në 2017-ën. Por tashmë nisin finalet për ne, ndaj në çdo sfidë luajmë për trepikëshin”, përfundoi mesfushori.
