Pas Kaleb Ekubanit, zv.kapiteni Idriz Batha po mban një barrë kryesore te Partizani. Mesfushori është treguar vendimtar me golat e tij. Pas ndeshjes, Batha pohoi se i vjen mirë që fituan dhe se para përballjes u druhej gjirokastritëve.
“Në radhë të parë më vjen mirë që fituam, pastaj goli është kënaqësi ekstra. Fitorja ishte e rëndësishme, pasi kisha njëfarë sikleti para se të niste ndeshja duke parë kundërshtarin dhe forcën e tij. E rëndësishme është fitorja, por edhe goli ka lezetin e tij. Goli i shpejtë na ndihmoi, por besoj se, edhe nëse nuk do të kishim kaluar në avantazh në atë episod, do të shënonim më pas. E kishim vlerësuar maksimalisht kundërshtarin dhe ishim përgatitur që të shënonim në çdo kohë.
Lëshimi? E vërtetë që u tërhoqëm mbrapa në pjesën e dytë, por nuk është se toleruam. Mendoj se në këtë fazë që jemi, duhet t’i racionojmë forcat. Kishim shënuar dy gola dhe Luftëtari ishte me 10 lojtarë, prandaj sikur e kishim siguruar edhe fitoren. Mendoj se u kursyem që të ruanim energjitë”, u shpreh Batha.
FITORJA NDAJ TË VOGLAVE
“Mendoj se kjo vjen nga eksperienca që kemi tani të gjithë në ekip. Kemi mësuar nga gabimet e vjetshme dhe të parvjetshme. E dimë se sa e fortë është gara për t’u shpallur kampionë dhe se sa punë kemi. Mendoj se ky është viti i duhur, pasi po e tregojmë javë pas jave. Mendoj se i kemi të gjitha shanset për ta fituar. Jemi në vend të parë dhe pse të mos shpresojmë”.
NDESHJA E KUKËSIT
“Shpresojmë që Kukësi të ndalet ndaj Vllaznisë. Futbolli prandaj është i bukur. Ne mendojmë vetëm për ndeshjet tona, por pse jo të ndalet edhe kundërshtari”, vijoi mesfushori.
SEZONI MË I MIRË
“Si golashënues, ky është sezoni më i mirë, por si rendiment loje jo. Shpresoj të shënoj më shumë”, përfundoi Batha pas ndeshjes.
