Nga Roland Bejko
Unë i mirëkuptoj arsyet e mospjesëmarrjes sot të deputetëve të PD në seancën parlamentare, por më besoni, nëse unë do isha deputet, do hyja në atë sallë dhe do votoja pro heqjes së mandatit të deputetit Sali Berisha. Nuk kam asgjë personale me z. Berisha. Qëndrimi do ishte politik për këto arsye:
1. Sot do shkoja të votoja në respekt të qëndrimeve të mia dy vjeçare kundër modelit të berishizmit, autoritarizmit, hipokrizisë, linçimit, dhunës fizike dhe dhunës verbale, shpifjes, përbaltjes, populizmit, anatemimit, gënjeshtrës që përfaqësohen nga deputeti që tek e fundit e solli vetveten në këtë situatë të turpshme për qëllime personale në kurriz të demokratëve dhe vet PD, duke bërë një dëm të pariparueshëm për ta, me ligësinë që pas mua u bëftë qameti.
2. Sot do ta konsideroja si ditën që do ndante Partinë Demokratike nga e shkuara e saj plot dritë hije, me orientimin e qartë drejt një modeli politik perëndimor.
3. Sot do ta konsideroja si një ditë historike, që do t’i jepte fund tranzicionit politik 32 vjeçar të përfaqësuar nga berishizmi si një elitë që na erdhi si zgjatim i ramizizmit të viteve 1990.
4. Sot duke shkuar në parlament, do votoja për forcimin edhe më shumë të partneritetit të PD me SHBA të cilët kanë dalë garant të instalimit të drejtësisë së re duke i shpallur luftë elitës së korruptuar, krimit të organizuar dhe politikës konfliktuale.
5. Sot me votën time, do çertifikoja mbështetjen absolute të PD ndaj prokurorëve të SPAK duke i inkurajuar ata të futin në rrjetën e tyre këdo nga zyrtarët që ka abuzuar me fondet publike.
6. Sot vota ime në parlament, do çertifikonte mbylljen përfundimtare të një kapitulli të erët dhe çeljen e një ere të re politike duke i dhënë fund pandëshkueshmërisë në nivelet më të larta të shtetit.
PS. Rënia e Berishës, është fillimi i fundit të Ramës, prandaj dita e sotme do të mbahet mend gjatë në histori.
