Vllaznia dhe Luftëtari janë dy skuadra, që luajnë futboll të hapur. Kjo gjë është parë më së miri edhe në ballafaqimin e fazës së dytë, kur 5 golat e shënuar në stadiumin “Loro Boriçi” ishin treguesi më i mirë i lojës sulmuese të tyre. Fati, por edhe ndonjë luhatje në veprimet mbrojtëse të kuqebluve, bënë që gjirokastritët të largoheshim me 3 pikë nga Shkodra në atë ndeshje. Dhe atë që bëri Luftëtari në “Loro Boriçi” mund ta bëjë fare mirë Vllaznia në stadiumin e Gjirokastrës këtë fundjavë. Ky është mendimi i ish-futbollistit Amarildo Belisha, i cili, duke njohur lojën e të dyja skuadrave, ka besim të plotë se publiku do të shijojë një ndeshje të hapur dhe se shkodranët do të godasin e do të kthehen në Shkodër me rezultat pozitiv. Belisha e njeh mirë mentalitetin e trajnerit Cungu, me të cilin ka pasur rastin të luajë në një ekip, madje edhe të fitojë trofe. Ai beson se Cungu do të dijë ta rreshtojë skuadrën në atë mënyrë, që në mos fitoren, Vllaznia të marrë barazimin në këtë ndeshje. “Për mua Luftëtari bën një futboll shumë të bukur, një futboll sulmues, por ka edhe defektet e veta. Luan shumë i hapur dhe, po ta shikosh, pothuajse në çdo ndeshje pëson gol. Pavarësisht se shënon shumë gola, pëson shumë gola”, – thotë Belisha, duke parashikuar se kuqeblutë do ta gjejnë golin në Gjirokastër. Dhe e pret nga Elis Bakaj, një nuhatës i përsosur goli, gjë që po e tregon me fanellën e Vllaznisë: “Bakaj ka një kualitet për t’u admiruar dhe këtë e kemi parë edhe në ndeshjet e kaluara. Një lojtar, që kur i paraqitet rasti, e shndërron në gol. Duke shtuar mbështetjen e fuqishme, që do të ketë nga krahët, nga kapiteni Shbubina, Kalaja, Çinari apo ndonjë tjetri, Bakaj do ta ketë më të lehtë ta çojë topin në rrjetë”, – shton Belisha.
RIKTHIMET – Vllaznia pa Bakajn në formacion është ndeshur dy herë me Luftëtarin. Në fazën e parë, 90-minutëshi i luajtur në fushën asnjanëse të Peqinit, është mbyllur në barazim 1-1, me golin e kapitenit Shtubina. Për fazën e dytë në “Loro Boriçi”, në fitoren e gjirokastritëve 2-3, për kuqeblutë shënoi përsëri Shtubina dhe Marku golin e dytë. Marrjen e rezultatit pozitiv të Vllaznisë në këtë transfertë, Belisha e bazon edhe te fakti se në radhët e kuqebluve ka rikthime të rëndësishme, ku krahas treshes së titullarëve Gocaj-Vrapi-Krymi, që shlyen skualifikimin me tre kartonë të verdhë, kthehet edhe mbrojtësi Denis Pjeshka, i cili gjatë javëve të fundit ka shfaqur një formë të mirë sportive. Megjithatë, për të marrë të paktën një pikë në fushën e Luftëtarit, Belisha kërkon që Vllaznia të jetë më e kujdesshme në mbrojtje. Sipas tij, gjatë ndeshjeve të fundit, përfshirë edhe atë me Skënderbeun, reparti i prapavijës nuk ka qenë në nivelin e duhur, ndaj ai tërheq vëmendjen që lojtarët e këtij reparti të jenë të vëmendshëm në veprimet e tyre, për të mos lënë hapësira. Nëse ndodh kështu, Belisha është i bindur se skuadra shkodrane do të kthehet me pikë nga Gjirokastra.
