Sali Berisha, u prit në mënyrë entuziaste në Lazarat. Përpara banorëve, Berisha u zotua se do bëjë gjithçka për Lazaratin, duke e quajtur simbol të rezistencës. Ai përmendi ndërhyrjen e policisë në qershor 2014 për të pastruar parcelat me kanabis, duke thënë gjithashtu se Dasho Aliko, ish-kryetar komune asokohe, rezistoi.
“Unë kam ardhur këtu te ju, për t’u zotuar përpara jush, se me deputetin tuaj, me Dasho Alikon, i cili në një moment kritik kur regjimi u vërsul me egërsi ndaj jush, qëndroi me ju dhe nuk u mposht. Kam ardhur këtu për t’u zotuar se potencialet tuaja do kenë prosperitetin që meritojnë. Këtë regjim ta përzëmë sa më shpejt dhe të vendosim demokracinë në Shqipëri. Unë kam ardhur për të dëgjuar zërin tuaj, propozimet tuaja, mençurinë tuaj, që do jenë pjesë e rëndësishme e programit të PD-së,” tha Berisha.
Kujtojmë që për kanabisin në Lazarat, Sali Berisha ka deklaruar se ishte politikë e tij që ta lejonte kultimin. ©argjiroja.net
