Shoqata e Biznesit i kërkon Ministrisë së Shëndetësisë dhe Komitetit Teknik të Ekspertëve që të rishikohen masat antiCOVID në vend.
Përmes një letre zyrtare, ato shprehen se orari i kufizimit deri në orën 00:00, i ka vënë bizneset në vështirësi ekonomike pasi nuk mund të ushtrojnë aktivitetin e tyre.
Sipas Shoqatës së Bizneseve, kufizimet i kanë vendosur nën presion të vazhdueshëm subjektet.
KËRKESA E SHOQATËS SË BIZNESIT
Referuar masave në fuqi të VKM dhe Komitetit Teknik të Ekpertëve në kuadër të pandemisë së Covid-19, kërkojmë lehtësira nga ju, pasi ne si biznese po përballemi me vështirësi ekonomike. Ora policore ende në fuqi, na privon nga aktivitetet që ne si biznese (lokale) zhvillojmë; (dasma, gëzime familjare e cermoni të tjera), duke na ushtruar presion të vazhdueshëm dhe nuk na lejojnë të zhvillojmë normalisht aktivitetin tonë ekonomik, brenda orarit të lejuar nga institucionet, çka na vështirëson së tepërmi ekonominë, gjë e cila reflektohet edhe te të ardhurat familjare të çdo drejtuesi biznesi.
Për këtë arsye kërkojmë të rishikohen masat në fuqi, duke patur parasysh edhe numrin e ulët të rasteve me infektime nga covid 19, ashtu sikurse edhe vdekshmërinë. Goditja që kemi marrë nga një vit mbylljeje për shkak të pandemisë së covid 19, dhe orës policore ende në fuqi, do të na e vështirësojë akoma dhe më shumë ekonominë dhe financat, duke na cuar drejt falimentit.
Është e udhës të gjendet një zgjidhje dhe reagim sa më i shpejtë nga ana juaj, në te kundërt edhe ne referuar rregullave e ligjeve në fuqi do të reagojmë. Duke ju falenderuar, Shoqatat e bizneseve.
Kujtojmë që dy ditë më parë, disa biznesmenë në Vlorë u ngritën në formën e protestës duke kërkuar rishikimin e orarit të kufizimit. Ata paralajmëruan se nëse nuk do të ketë një reagim nga qeveria, nga java e ardhshme mund të mbyllin bizneset e tyre.
