Prej dy ditësh kanë nisur në Kretë bisedimet Shqipëri-Greqi, në një përpjekje për të zgjidhur disa nga çështjet e hapura mes dy vendeve. Takimet po zhvillohen kokë më kokë mes dy ministrave të Jashtëm, Ditmir Bushati dhe Nikos Kotzias, bashkë me stafet e ngushta që i shoqërojnë.
Pjesë e delegacionit shqiptar përveç ministrit Bushati është edhe Qirjako Qirko, Ambasador i Shqipërisë në Mbretërinë e Bashkuar, ish- sekretar i përgjithshëm në Ministrinë e Punëve të Jashtme, Odeta Barbullushi, zv. ministre e Jashtme, si dhe Glevin Dervishi dhe Edlira Prendi, këshilltarë të ministrit Bushati.
Dervishi ka publikuar në faqen e tij në Facebook këtë foto ku shihen të gjithë bashkë në Kretë. Ajo që bie në sy është mungesa e Artemis Dralos, zv.ministres së Jashtme të emëruar para dy muajsh, e cila për më tepër është me origjinë nga minoriteti grek në Dropull. Ndoshta Bushati ka preferuar Odeta Barbullushin, të cilën e ka patur në krah edhe gjatë mandatit të parë në Ministrinë Jashtme.
Ndërkohë zv.ministrja tjetër Artemis Dralo ndodhet në Dibër, aty ku u zhvillua mbledhja e radhës e qeverisë. Të paktën kjo kuptohet nga postimet e saj në Facebook, përmes të cilave tregon se po e shijon shumë Dibrën.
©ArgjiroLajm.net
