Deputetja e PD-së, Ina Zhupa, hodhi akuza ndaj kryetares së Gjykatës Kushtetuese, Holta Zaçaj, teksa foli në lidhje me vendimin për koncesionin e Butrintit.
Në një konferencë për mediat, Zhupa tha se vendimi i Gjykatës Kushtetuese është në shkelje të ligjit dhe shkatërron trashëgiminë kulturore. Sipas saj, Holta Zaçaj është kundër interesit publik.
“Dje është zbardhur vendimi i Gjykatës Kushtetuese mbi Butrintin që rezulton të jetë kundër Kushtetutës dhe Shqipërisë dhe mbrojtjes së Trashëgimisë Kulturore. Ky vendim është marrë në një shumicë të brishtë 5 me 4.
Dua të theksoj dy elemente të rëndësishme që kanë dalë sot që janë se në nëntor 2023 në seancë plenare kam kërkuar përjashtimin e tre gjyqtarëve që janë Holta Xhacaj, Gent Ibrahimi dhe gjyqtarin Sandër Beci dhe kishim indicie për konflikt interesi.
Gent Ibrahimi është i faktuar se ka pasur lidhje me dy krerët e ADF-së duke tejkaluar dhe kompetencat e tij si kreu i KLP-së në atë kohë. Kjo miqësi u shtri edhe në vendimmarrjen për një çështje ku ata ishin të përfshirë drejtpërdrejtë si anëtarë të bordit në koncesionin e Butrintit”, u shpreh ajo.
Deputetja paralajmëroi padi në SPAK, si dhe në Gjykatën e Strasburgut.
“Tashmë që kemi dhe vendimin, do të duhet t’i drejtohemi me një padi SPAK-ut për ta gjykuar veprimtarinë e organeve shtetërore, veprimtarinë e ADF-së dhe 3 gjyqtarët që për ne janë në konflikt interesi. Kemi detyrimin që t’i drejtohemi SPAK-ut. Mund t’i drejtohemi dhe me një padi edhe Gjykatës së Strasburgut, sepse kemi dhe shkelje të të drejtave të njeriut”, theksoi Zhupa.
