Sot në Gjirokastër u regjistrua akti i dytë aleancës PD-LSI. Me shumicë votash këto dy parti shkarkuan kryetarin e këshillit, Roland Karalli, i cili ishte përfaqësues i PS-së, ndërsa zgjodhën në vend të tij, Mimoza Çomon, ish-prefekte dhe ish kandidate për deputete e PD-së. Por ajo që vihet re, sidomos nga reagimet e kryetarit të PD, Roland Bejko, ka një këmbëngulje të tij për të mos lënë të kuptohet se ka marrëveshje me LSI-në.
“Vlen të sqarojmë opinionin publik se kjo lëvizje sot në Këshill nuk ishte pasojë e një marrëveshjeje politike PD -LSI pasi nuk egziston një e tillë, por ishte rezultante e një luajaliteti llogjik për shkak se me daljen e LSI në opozitë, rrugët e tyre me PS u ndanë, dhe kualicioni mbaroi së funksionuari. Të gjendur në opozitë PD dhe LSI vetvetiu PS e kanë një kundërshtar të qartë dhe të vetëm politik. Pra në këtë rrugëtim opozitar piktakimet midis nesh janë të pashmangshme. Njëra prej tyre ishte edhe kjo e sotmja në Këshillin e Bashkisë Gjirokastër”, thotë Bejko.
Javën e shkuar ArgjiroLajm.net publikoi lajmin se Zamira Rami emëroi si administrator të Lazaratit, Benard Pollon, kreun e PD Lazarat. Sërish Roland Bejko nxitoi të sqaronte se ai ishte thjesht një emërim personal dhe se s’ka asnjë marrëveshje me LSI-në. Edhe pse ngjan absurde se si një parti tjetër (LSI në këtë rast) mund të të marrë kryetarin e partisë tënde (Benard Pollon) dhe ta emërojë aty ku ajo do. Por përse gjjithë ky siklet apo ‘frikë’ për të pranuar aleancën PD-LSI? Emërimi i Benard Pollos, zgjedhja e Mimoza Çomos dhe gjithë qasja e re e PD-së në Gjirokastër ndaj Zamira Ramit janë hapur një aleancë mes të dy forcave. Sigurisht që këtu s’ka asnjë mëkat, pse dy forca bëhen bashkë me njëra-tjetrën, ndonëse bashkëpunimet në Shqipëri nuk bëhen mbi baza programore apo qasje ideologjike, por thjesht për ndarjen e ‘tepsisë’ së pushtetit. Atëherë pse nguron Roland Bejko dhe PD-ja ta pranojnë aleancën me LSI-në? Lepuri fle gjetkë!
Nëse PD u deklaron haptaz që tani mbështetësve të saj koalicionin me LSI-në, kjo do t’i demotivonte ndjeshëm ata. Pjesa më e madhe e mbështetësve të PD-së nuk e duan një koalicion të dytë me LSI-në, pasi prej koalicionit të parë në vitin 2009 nisi edhe rrënimi i partisë së tyre. Mbështetësit e PD-së nuk duan rikthim në pushtet me ‘patericën’ e LSI-së sepse e dinë që kanë për të qenë sërish të pashpresë. Në këto kushte, Roland Bejko, nuk do ta pranojë publikisht koalicionin me LSI-në sepse e di që kjo i prish punë me të vetët, prandaj në çdo rast nxiton të theksojë se s’ka marrëveshje mes dy palëve. Sigurisht që mund të mos ketë marrëveshje të shkruar, por kjo as nuk shton dhe as nuk heq asgjë prej asaj që tani është fakt; PD-LSI janë bashkë në Gjirokastër, po ndajnë me njëra-tjetrën ‘tepsinë’ e pushtetit të bashkisë. Ndërkohë për LSI-në s’ka asnjë problem të deklarojë së është në koalicion me PD-në. LSI-ja ka thjesht qëllim pushtetin, të vazhdojë të jetë pjesë e ‘tepsisë’, pavarësisht me kë është në qeveri, me PD-në apo PS-në. Ndonëse tani PD është futur në ‘tepsinë’ e pushtetit të Bashkisë Gjirokastër, ajo i druhet asaj çfarë e pret; zgjedhjet lokale! Zamira Rami do të kërkojë një mandat të dytë, por kësaj here në koalicion me PD-në. Kjo e fundit nuk e kapërdin dot që këtë bashki t’ja lëshojë sërish LSI-së. Të dyja bashkë e provuan në vitin 2011 dhe nuk e fituan dot Bashkinë Gjirokastër. Sot e tutje është e kotë që PD-ja të sillet sikur është në opozitë me Zamira Ramin, pasi këtë fabul nuk e beson më askush. U bë që u bë kjo ‘martesë’ e dytë, të paktën çojeni stekën e kërkesave te Zamira Rami, mos u mjaftoni vetëm me Benard Pollon dhe Mimoza Çomon.
©ArgjiroLajm.net
