Sot pati raportime në media se Bashkia Gjirokastër është mbyllur pjesërisht nga ISSH për shkak të rasteve me Covid, por kryetari Flamur Golemi përmes një postimi në faqen në Facebook, shkruan se janë thjesht shpifje që nuk duhen marrë seriozisht. Ai komunikon edhe tre vendime të mira sipas tij që janë marrë në mbledhjen e sotme të Këshillit Bashkiak.
Postimi i plotë i Golemit
Lajme të mira nga mbledhja e sotme e Këshillit Bashkiak Gjirokastër. Miratuam shpërblimin financiar për 63 nxënës ekselentë në gjimnazet dhe shkollat 9-vjeçare, shumë që varion nga 5 mijë deri në 10 mijë lekë të reja. Zgjidhëm kontratën e qerasë dhe stadiumi i qytetit sot e tutje do të administrohet nga Bashkia Gjirokastër. Miratuam krijimin e Fondacionit “Akademia e Futbollit Luftëtari”, që do të ringrejë ekipin, të cilin për fat të keq e rrënuan ata që krijuan malin me borxhe dhe që ne i kemi çuar përpara drejtësisë për të dhënë llogari. Miratuam bashkëfinancimin me TID Gjirokastra për të nisur menjëherë dekorin për festat e fundvitit. Ata që thonë se bashkia është mbyllur për shkak të Covid, thjesht mos i merrni seriozisht.  S’kanë punë tjetër veçse të shajnë e shpifin nga frëngjitë e Facebook. 
