Ndeshja e së shtunës, në Gjirokastër, ndaj Luftëtarit vendas, konsiderohet e vështirë, megjithatë objektivi i Vllaznisë do të jetë marrja e pikëve, paçka se edhe kundërshtari, sidomos pas barazimit të fundit me Laçin, do të jetë i vendosur për të fituar.
Megjithatë, trajneri i ekipit shkodran, Armando Cungu, beson te futbollistët që drejton. “Normalisht, ndeshja me Luftëtarin është e vështirë, sepse kemi të bëjmë me një ekip simpatik, që lufton fort dhe që në shtëpinë e tij, më duket se është i vetmi ekip, bashkë me Kukësin dhe Partizanin, që nuk njeh humbje.
Unë shpresoj shumë që ta thyejmë këtë tabu në fushën gjirokastrite. Të gjitha mundësitë i kemi. Besoj se do të jetë një ndeshje e hapur, e cila i ka të tria rezultatet brenda. Patjetër që do të shkojmë për të bërë lojën tonë dhe për të marrë pikë. Sigurisht, barazimi i arritur pak ditë më parë ndaj Laçit mund t’i ketë vënë pak nën presion gjirokastritët, por kjo mund të shërbejë edhe në aspektin pozitiv, për një karikim maksimal ndaj Vllaznisë. Për ne pak rëndësi ka, nëse kundërshtari është i karikuar apo jo. E rëndësishme është që të jemi të qetë dhe të dimë si të përballojmë kundërshtarin”./telesport
