Aktori i njohur i Hollywood-it, Bruce Willis, ka bërë një paraqitje të rrallë publike këtë javë, duke gëzuar fansat që e panë të lumtur dhe të qetë. 70-vjeçari u fotografua duke shijuar një ditë me diell në Los Angeles, sipas pamjeve të siguruara nga TMZ.
Ylli i filmave “Die Hard” dhe “Pulp Fiction” u pa i veshur me një T-shirt gri, pantallona bezhë, atlete të bardha dhe një kapele bejsbolli, teksa buzëqeshte nën diellin kalifornian. Kjo ishte dalja e tij e parë publike pas disa muajsh, ndërsa ai vazhdon betejën me demencën frontotemporale, sëmundje që i është diagnostikuar në vitin 2023.
Ndërkohë, bashkëshortja e tij Emma Heming Willis dhe ish-bashkëshortja Demi Moore ndodheshin në Nju Jork, ku morën pjesë në një koncert bamirësie në nder të aktorit. Aktiviteti, i organizuar nga Soho Sessions, mblodhi fonde për Shoqatën për Degjenerimin Frontotemporal (AFTD) dhe solli performanca nga emra të mëdhenj si Keith Richards, Norah Jones dhe Mavis Staples.
Emma u shpreh se Bruce “do ta kishte adhuruar këtë mbrëmje”, duke kujtuar dashurinë e tij për muzikën live. Në një intervistë për podcastin Heal Squad, ajo foli edhe për sfidat emocionale të kujdesit ndaj bashkëshortit të saj, duke theksuar rëndësinë e kujdesit për veten.
Megjithë diagnozën e rëndë, familja e Willis mbetet e bashkuar, ndërsa Emma thotë se aktori është “në gjendje të mirë shëndetësore dhe plot dashuri e dritë”.
