Lëvizja Bashkë nuk e ka votuar ligjin për barazinë gjinore, as pro, as kundër dhe as ka abstenuar, duke mos marrë pjesë fare në votim.
Deputeti i vetëm i kësaj partie, Redi Muçi, i kontaktuar nga TPZ, deklaroi se ligji mbi barazinë gjinore është hartuar për të plotësuar disa rekomandime të BE-së, por nuk merr parasysh specifikat e Shqipërisë, konkretisht sipas tij, “nuk merr në konsideratë informalitetin në punë, nuk përmend miratimin e një minimumi jetik që do të ndihmonte gratë dhe nuk specifikon objektiva për masat që do t’ju vinin në ndihmë grave për të dalë nga puna shtëpiake”.
I pyetur nëse Lëvizja Bashkë ka propozuar amendamente të projektligjit të cilat mund të adresonin këto shqetësime, Muçi tha se nuk ka propozuar amendamente për të përmirësuar këtë ligj pasi e konsideron se ligji ka nevojë për “ndryshime rrënjësore”.
“Arsyeja pse nuk votova dje per ligjin mbi barazinë gjinore eshtë se e konsiderojmë si tipikisht një ligj që hartohet në letër për të plotësuar disa rekomandime te BE, por që nuk merr në konsideratë specifikat e Shqipërisë per ta bërë atë të zbatueshëm dhe në të mirë të barazisë gjinore.
Përshembull ky ligj flet për pabarazinë në paga, por nuk merr në konsideratë informalitetin në vendin e punës që bën që dhjetëra mijëra punëtore të fasonerive, apo gra që punojnë si sanitare, etj, të mos marrin as pagën minimale.
Ky ligj flet ne mënyrë të vagullt për njohjen e punës së grave që punojnë në biznese familjare në skemën e pensioneve, por nuk flet për përfshirjen në skemë për gratë shtëpiake që kujdesen për familjen dhe nuk specifikon asgjë më shumë për ta bërë këtë propozim të zbatueshëm, në një kontekst ku skema e pensioneve edhe kështu siç eshtë po shkon drejt falimentit.
Ligji nuk përmend përshembull miratimin e Minimumit Jetik, qe do t’i ndihmonte shumë gratë që ndodhen në një kontekst familjar në vështirësi ekonomike, kontekst në të cilin abuzimet ndaj grave janë edhe më të rëndat. Ligji nuk specifikon as objektiva të matshëm për nje sërë masash që do t’u vinin në ndihmë grave për të dalë nga puna shtëpiake/kujdesi familjar, si numri i mjaftueshëm dhe cilësia e çerdheve dhe kopshteve, shkollat me orar të zgjatur etj, ekzistenca e të cilave do t’u mundësonte grave përfshirjen e plotë në punën profesionale dhe jetën ekonomike të vendit”, deklaroi Muçi.
Barazia gjinore është një nga pikat e programit që Lëvizja Bashkë paraqiti kur garoi në zgjedhjet e 11 majit 2025. Në këtë program thuhej se: “Barazia gjinore është një parim themelor i drejtave të njeriut dhe një kusht i domosdoshëm për zhvillimin e qëndrueshëm të një shoqërie. Kur grave u sigurohen të njëjtat mundësi si burrave, ato kontribuojnë në mënyrë të barabartë në ekonomi, politikë dhe jetën shoqërore. Studimet tregojnë se vendet me nivele më të larta të barazisë gjinore kanë tendenca për ekonomi më të forta, nivele më të ulëta të varfërisë dhe një cilësi më të mirë jetese për të gjithë qytetarët. Përveç kësaj, një shoqëri e edukuar, arsimuar dhe e ndërgjegjësuar për barazinë gjinore është më e aftë të luftojë stereotipat dhe paragjykimet që pengojnë zhvillimin e plotë të individëve dhe të shoqërisë në tërësi.
LEVIZJA BASHKE aspiron të kontribuojë në ndërtimin një shoqërie ku gratë dhe çdo minorancë identitare të kenë mundësi të jetojnë pa frikë dhe të gëzojnë të drejtat dhe liritë e plota”.
