Abuzimi ndaj vajzës ka nisur që kur ajo ishte 12 vjeç, nga daja i babait të saj Kabul Hunda. 53-vjeçari nga Libohova dyshohet se ka ushtruar marrëdhënie seksuale me dhunë sistematikisht me 16-vjeçaren.
Denoncimin në polici e ka bërë xhaxhai i së miturës, ndërsa familjarët pohojnë jashtë kamerave se vajza dukej e trembur prej një periudhe të gjatë, por vetëm dje i ka treguar nënës së saj.
“Për herë të parë e kishte dhunuar te shtëpia e tij. Ai është daja i burrit. I ka vdekur gruaja dhe jetonte vetëm. Nuk e di si e ka gënjyer vajzën për herë të parë, se ajo ka qenë e vogël. Më tha vajza dje. Ka kryer vazhdimisht marrëdhënie me vajzën. As që më shkonte mendja, unë mendoja se ai na përkrahte”.
E ëma e 16-vjeçares thotë se abuzuesi vinte shpesh në familjen e tyre.
“Tani vajza shyqyr Zotit është mirë, mund të më kishte vdekur nga të qarat, e katërta ditë sot që qan. Kunati bëri denoncimin në polici. Nuk e dua më jetën. Kam dhe tre fëmijë të tjerë, nuk u kemi thënë. Burri është shumë keq, kemi frikë, nuk duam të merret vesh, do ishte keq për vajzën”.
Kabul Hunda tashmë është arrestuar, dhe do të hetohet nga Prokuroria e Gjirokastrës, për veprën penale “Marrëdhënie seksuale ose homoseksuale më dhunë me të mitur të moshës 14-18 vjeç”.
