Dy shtetasit bullgarë të cilët u arrestuan nga policia mëngjesin e së dielës, në tentativë për të hapur me trapan bankomatin e një banke të nivelit të dytë, nuk kanë pranuar akuzën e ngritur ndaj tyre.
Të marrë në pyetje veçmas njëri-tjetrit, burime pranë uniformave blu bënë me dije se të dyshuarit kanë dhënë dëshmi kontradiktore. Në këtë mënyrë, ata kanë rënduar pozitën e tyre, duke përforcuar edhe më shumë provat që Policia e Sarandës ka mbledhur në vendin e ngjarjes. Sipas të njëjtave burime u bë me dije se shtetasi i arrestuar Aleksandros Doan, 46 vjeç, lindur në Turqi dhe banues në Sofje, Bullgari, ka pohuar para grupit hetimor se kishte shkuar në bankomat për të tërhequr para, por se ishte larguar kur kishte vënë re se ai nuk funksiononte. “Kam shkuar te bankomati vetëm për të tërhequr lekë por bankomati nuk ka funksionuar dhe në atë moment unë jam larguar bashkë me shokun tim derisa na ka kapur policia”, – ka thënë ai në polici.
Ndërsa i dyshuari tjetër, i identifikuar nga policia si shtetasi Mihaill Karaxhanov, 29 vjeç, lindur dhe banues në Varna, Bullgari, ka deklaruar se kishte shkuar te bankomati për t’i dhënë ndihmën një shtetaseje, së cilës i kishte mbetur karta brenda, teksa ajo kishte qenë duke tërhequr paratë. “Kam shkuar te bankomati vetëm për të ndihmuar një shtetase që i kishte ngelur një kartë në bankomati, dhe unë kam futur në bankomat një pajisje metalike për të nxjerrë kartën, por bankomati nuk ka funksionuar dhe jam larguar bashkë me shokun tim derisa na ka kapur policia”, – mësohet të ketë thënë ai para uniformave blu. Ndërkaq, burime pranë policisë sqaruan se, ndryshe nga Aleksandros Doan, 29- vjeçari Karaxhanov nuk ka pranuar ta firmosë procesverbalin e policisë. Ditën e sotme pritet që dy të dyshuarit të dalin para gjykatës për t’u njohur me masën e sigurisë që do të caktohet ndaj tyre, shkruan GSH.
Ndaj të dyshuarve është ngritur akuza “Vjedhje e bankave dhe arkave të kursimit, e mbetur në tentativë”. Ngjarja për të cilën akuzohen ndodhi në lagjen nr.4 të qytetit të Sarandës, pranë portit.
Bankomati i një banke të nivelit të dytë ishte i vendosur në mjediset e një biznesi për shkak të fluksit të turistëve që ka kjo rrugë. Pas vënies në pranga të dy personave të lartpërmendur, policia u gjeti dhe u sekuestroi një trapan, si dhe disa vegla të tjera që do t’i përdornin për të kryer vjedhjen e bankomatit.
