Nxënësit ekselentë të Gjirokastrës duke filluar nga viti i ardhshëm do të marrin edhe një bonus financiar nga bashkia. Kështu ka thënë sot kryebashkiaku Flamur Golemi gjatë një eventi festiv ku performuan për fëmijët akrobatë e animatorë të Cirkut të Tiranës.
“Sot ishte një i ftohtë i paparë në Gjirokastër. Por jo aq sa për të na penguar që bashkë me fëmijët të dilnim në sheshin “Çerçiz Topulli” për të shijuar spektaklin e përgatitur nga animatorët dhe akrobatët e Cirkut të Tiranës. Është periudha më e bukur e vitit kur duhet të gëzojmë, të argëtohemi dhe të jemi pranë njëri-tjetrit më shumë se çdo herë tjetër. I lumtur pa masë që dhashë gjithashtu edhe disa çertifikata mirënjohje për nxënësit e shkëlqyer në mësime. Vitin tjetër do të bëjmë më shumë se kaq për ta. Do të kemi një buxhet të caktuar për t’u dhënë një bonus vjetor simbolik, për t’i shpërblyer dhe inkurajuar më tej në përpjekjen e tyre për të qenë mes të mirëve në mësime. Këtë ditë në prag Krishtlindje e bëtë më të bukur me buzëqeshjet dhe fytyrat tuaja të gëzuara”, shkruan Golemi
Mësohet se me buxhetin e vitit të ardhshëm Bashkia Gjirokastër parashikon të shpërblejë me rreth 100 mijë lekë të vjetra çdo nxënës me rezultate të shkëlqyera në mësime.
©argjiroja.net
