Lirim Kastrati ishte menduar si një mungesë e sigurt për pjesën e mbetur të sezonit, pasi dëmtimi i pësuar disa javë më parë ngriti dyshime të forta për një mbyllje të parakohshme të edicionit për sulmuesin e krahut të Vllaznisë. Megjithatë, zhvillimet e fundit kanë sjellë një panoramë krejt tjetër, duke rritur ndjeshëm optimizmin në kampin kuqeblu. 27-vjeçari ka qenë i pranishëm në seancat e fundit stërvitore, duke dhënë sinjale të qarta se rikuperimi po ecën në drejtimin e duhur.
Edhe pse ende nuk është bashkuar plotësisht me grupin, Kastrati ka nisur vrapimet individuale dhe ushtrimet e lehta, një hap i rëndësishëm drejt rikthimit të plotë në fushë. Stafi mjekësor dhe teknik po e ndjekin me shumë kujdes gjendjen e tij fizike, duke mos dashur të rrezikojnë me një rikthim të nxituar. Forma e numrit “7” do të jetë në qendër të vëmendjes në ditët në vijim, ku çdo progres i tij do të vlerësohet me detaje për të përcaktuar momentin e duhur të rikthimit.
Pavarësisht përmirësimeve të dukshme, aktivizimi i tij në ndeshjet e ardhshme të afërta duket ende i pamundur. Kastrati pritet të mungojë edhe për disa javë, ndërsa prioritet mbetet rikuperimi i plotë dhe shmangia e çdo komplikacioni të mundshëm. Megjithatë, lajmi i mirë për Edi Martini dhe skuadrën është se ekziston një mundësi reale që sulmuesi të rikthehet në dispozicion në fazën më vendimtare të sezonit.
Një rikthim i tillë do të ishte një “përforcim” i rëndësishëm për Vllazninë, duke pasur parasysh rolin dhe peshën që Kastrati ka në lojën sulmuese të ekipit. Ky zhvillim ka sjellë një valë optimizmi jo vetëm te stafi teknik, por edhe te tifozët kuqeblu, të cilët e konsiderojnë Kastratin si një nga elementët kyç të skuadrës. Nëse gjithçka shkon sipas planit, rikthimi i tij mund të përkojë me momentet më të rëndësishme të sezonit, aty ku Vllaznia do të ketë më shumë nevojë për cilësinë dhe shpejtësinë e tij në krah.
© BalkanWeb
Për t’u bërë pjesë e grupit “Balkanweb” mjafton të klikoni: Join Group dhe kërkesa do t’ju aprovohet menjëherë.
Grupi Balkanweb
